वाळपय, केप्यां पावसान हुपली इंचाची शंबरी

भांगरभूंय | प्रतिनिधी

भांगरभूंय I प्रतिनिधी
पणजी : गोंयांत आतां मेरेन वाळपय आनी केप्यां पावसान इंचाची शंबरी हुपल्या. वाळपय म्हालांत आतां मेरेन 102.38 इंच, जाल्यार केपें म्हालांत 100.63 इंच पावसाची नोंद जाल्या. राज्य हवामान विभागान उक्तायिल्ल्या अदमासा प्रमाण मंगळारा गोंयांतल्या दर्यादेग वाठारांत कांय प्रमाणांत जाल्यार घांट वाठारांत उटंगाराचो पावस पडला.
गोंयांत 1 जूनाच्यान सुरू जाल्ल्या पावसाचें प्रमाण पळयल्यार आतां मेरेन पेडणें, वाळपय, केपेंत पावसान इंचाची शंबरी हुपल्या. वाळपय म्हालांत आतां मेरेन 102.38 इंच, केपें 100.63 इंच पावसाची नोंद जाल्या. राज्यांत आतां मेरेन वट्ट 89.35 इंच पावसाची गरज आशिल्ली. मात प्रत्यक्षांत 85.46 इंच पावस पडला. आयचे तारखे मेरेन 4.4 टक्के पावसाचो उणाव आशिल्ल्याचे हवामान विभागाच्या अहवालांत नमूद केलां.
बुधवारा सकाळीं 8 वरां मेरेन 24 वरांत फोंडें म्हालांत 0.81 इंच पावस जाल्यार पेडणें म्हालांत 0.59 इंच पावस पडला. काणकोण, सांगें, केपें वाठारांतूय बरो पावस पडला. आयज पावसाचो नेट उणो आसतलो. पूण फाल्यां परतून पावस नेट धरतलो, अशें हवामान खात्याचे संशोधक राहुल मोहन हांणी सांगलें.
मजगतीं, नुस्तेमारी खातीर दर्यादेगे पसून 75 कि.मि. मुखार वच्चें न्हय, अशी सादूरतायेची शिटकावणीय हवामान विभागान नुस्तेमाऱ्यांक दिल्या.