वाळपयंत पीएफआय संघटणेच्या कार्यरत आशिल्ल्या चार जाणांक अटक

भांगरभूंय | प्रतिनिधी

अटक केल्ल्या मदीं नगरसेवकाचो आस्पाव

वाळपय: सद्या गोंयांत पॉप्युलर फ्रंट ऑफ इंडियाच्या (पीएफआय) वांगड्यांची धरपकड सुरू जाल्या. सत्तरी म्हालांतल्या वाळपयंत हे संघटणेच्या कार्यरत आशिल्ल्या नाहीद कमलुद्दीन आगा (38) कियामुद्दीन इसाक आगा (48) सरफराज शमशुद्दीन सय्यद (36) आनी शराफत समृद्धीन हुसेन (58) हांकां आतंकवादी विरोधी पंगडान अटक करून तांची जामिनार सुटका करपाची घडणूक घडली. हाका लागून वाळपय शारांत खवदळ पडला. अटक केल्लो आदलो नगराध्यक्ष आनी सद्याचो नगरसेवक आसा.

मजगतीं, सरफराज शमशुद्दीन सय्यद हांणी हे घडणुके विशीं आपल्याक मानसीक धक्को बशिल्ल्याचें स्पश्ट केलां. हे संघटणेच्या कार्या कडेन आपलो कसलोच संबंद नासून लेगीत आपल्याक घुसपोवपाचो यत्न केला. आपली राजकी कारकिर्दी सोंपोवपाचो हो डाव आसून देवान तांकां माफ करूं अशी प्रतिक्रिया ताणें उक्तायली.

गोंयांत पॉप्युलर फ्रंट ऑफ इंडियाच्या संघटणेच्या कार्यरत आशिल्ल्या वांगड्यांक अटक करपाचें सत्र सुरू जालां. आतां मेरेन कार्यकर्त्यांक अटक करून तांची जामिनार सुटका केल्या. वाळपय वाठारांत हे संघटणेचें लिपचोरयां पद्दतीन कार्य सुरू आसा. हे संघटणेच्या कार्यांत खूबशा जाणांचो वांटो आशिल्ल्याचो दुबाव उक्तावन प्रतिबंधात्मक म्हूण वट्ट चार कार्यकर्त्यांक अटक करून तांची जामिनार सुटका केल्ल्याची म्हायती मेळ्ळ्या.

वाळपय वाठारांतल्या चार वांगड्यांचो आस्पाव आसा. हातूंत सर्फराज समशुद्दीन सय्यद हो वाळपय नगरपालिकेचो सद्याचो नगरसेवक आसून आदलो नगराध्यक्ष आसा. हाका लागून वाळपयंत खवदळ पडला.

मेळिल्ले म्हायती प्रमाण सफराज सय्यद आनी हेर चार जाणांक केंद्रीय आतंकवादी विरोधी पंगडाच्या वरिश्ठ अधिकाऱ्यांनी तांचे कडेन हे विशीं विस्तारान चर्चा केली आनी तांचो हे संघटणे कडेन आशिल्लो संबंद प्रस्थापीत करपाचो यत्न केलो. हातूंत सरफाज सय्यद आनी हेरांनी स्पश्टीकरण दिवपाचो यत्न केलो. पूण पयलींच्या म्हायती प्रमाण तांचो संबंद हे संघटणे कडेन आशिल्ल्याचें स्पश्ट करून तांकां अटक करून तांची जामिनार सुटका केली.

मजगतीं, हे संघटणे कडेन कार्यरत आशिल्ल्या आनीक खूबशा जाणांक अटक करपाची शक्यताय आसा. हे विशीं वरिश्ठ पांवड्या वयल्यान चवकशी सुरू आशिल्ल्याची म्हायती मेळ्ळ्या.