भांगरभूंय | प्रतिनिधी
कर्नाटकाच्या दर्यादेग वाठारांत जाल्ल्या चक्रीवादळाचो परिणाम
भांगरभूंय I प्रतिनिधी
पणजी : शुक्रारा गोंयांत कांय वाठारांनी विजांच्या गडगडाटा सयत घोग्यांनी पावस पडलो, जाल्यार कांय वाठारांनी मध्यम प्रमाणांत पावस पडलो. काल सांजे सगल्यांत चड पावस वाळपय पडलो. दोन ते अडेज वरां विजांच्या गडगडाटा सयत घोग्यांनी पावस पडलो. सांजे साडे स वरां उपरांत पावस उणो जालो. कांय प्रमाणांत लोकजीण विस्कळीत जाली. पूण उपरांत सगले पूर्ववत जाले.
ह्या आडवेळ्या पावसाक लागून रस्त्याचेर उदक सांचलें. कर्नाटकाच्या दर्यादेग वाठारांत चक्रीवादळ तयार जाल्ल्यान उत्तर आनी दक्षीण गोंयांत पावस पडपाचो अदमास हवामान विभागान उक्तायलो. सध्याच्या निरिक्षणा प्रमाण दिवचल आनी सत्तरी म्हालांत वाऱ्याचें प्रमाण चड आशिल्ल्यान घोग्यांनी पावस पडुये अशें हवामान खात्याचे शास्त्रज्ञ राहुल मोहन हांणी सांगलें. फुडले दोन दीस येलो अलर्ट जारी केला. राज्यांतल्या हेर वाठारांनी मध्यम प्रमाणांत पावस पडपाची शक्यताय आसा.
हवामान खात्याच्या स्वयंचलीत केंद्रांत किरकोळ पावसाची नोंद जाली. म्हापशें आनी पोरणें गोंयांत 0.05 इंच, जाल्यार पणजे 0.07 इंच पावस पडलो. अंदूं मान्सूना उपरांत 1.08 इंच पावस पडलो. फाटल्या वर्साचे तुळेंत 71.7 टक्के पावस उणो पडला, अशी म्हायती राहुल मोहन हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
