भांगरभूंय | प्रतिनिधी
गोंयच्या पर्यटन उद्देगाक उर्बा दिवपाचो उद्देशः दीपक बांदेकार
भांगरभूंय । डीआयपी
पणजीः देशांतल्या स शारांनी ‘गोवा@60’ रोड शोचें आयोजन केलां. अहमदाबाद शारांतल्यान ताची सुरवात जाली आनी उपरांत उदयपूर राजस्थान आनी आतां वाराणासींत रोड शो जाता. हे तीन दिसांचे कार्यावळींतल्यान गोंय मुक्ती चळवळीचो इतिहास, गोंयची गिरेस्त सांस्कृतीक परंपरा, जेवणखाण, सरबराय, दायज आनी उदरगतीचें सादरीकरण करतात. गोंयांतल्या पर्यटन उद्देगाक उर्बा दिवचे खातीर पर्यटकांक आनी गुंतवणूकदारांक आकर्शीत करप हो रोड शोचो उद्देश आसा, अशें म्हायती आनी प्रसिद्धी संचालनालयाचे संचालक दीपक बांदेकार बांदेकार हांणी स्पश्ट केलें. तांचे हस्तुकीं वाराणासींत रोड शोचें उक्तावण जालें. ह्या वेळार ते उलयताले.
हे कार्यावळीक पर्यटन खात्याचे संचालक निखील देसाय, उत्तर प्रदेश पर्यटन विभागाचे म्हायती अधिकारी कीर्तीमान श्रीवास्तव, गोंय पर्यटन उदरगत म्हामंडळाचे सरवेवस्थापक लक्ष्मीकांत वायंगणकार, म्हायती आनी प्रसिद्धी संचालनालयाचे म्हायती अधिकारी प्रकाश नायक, सहाय्यक पर्यटक अधिकारी मिलिंद चोडणकार, जायरात वेवस्थापक प्रवीणकुमार फळदेसाय ह्या वेळार हाजीर आशिल्ले. दीपक बांदेकारान सांगलें, गोंय आपले मुक्तीचें 60 वें वर्स मनयता. ते निमतान गोंय सरकारान गोंयांत साबार कार्यावळी आनी उपक्रमांचें आयोजन केलां. हे कार्यावळींचो एक भाग म्हूण ‘गोवा@60’ रोड शोचें देशाच्या विवीध राज्यांनी आयोजन केलां. ह्या माध्यमांतल्यान गोंयची संस्कृती, विवीध मळांचेर केल्ली उदरगत दाखयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
