भांगरभूंय | प्रतिनिधी
पणजी : राज्यांतल्या विवीध म्हालांनी किडणी संबंदीत दुयेंती मदीं वाड जायत आसा. हातूंत काणकोण म्हाल मुखार आसा. हांगा ४४२ लोकां फाटल्यान एक किडणीचो दुयेंती सांपडटा. हें प्रमाण आडावपा खातीर भलायकी खातें कितें उपाय काडटलें असो प्रस्न आमदार विजय सरदेसाय हांणी बिरेस्तारा सभाघरांत विचारलो. तेन्ना ह्या प्रस्नाक जाप दितना भलायकी मंत्री विश्वजीत राणे हांणी, काणकोणा किडणेच्या दुयेंतींचो आंकडो वाडतूच आसा. ताचो राष्ट्रीय एजन्सी वरवीं पुरायेन अभ्यास करतले. हे विशीं आपूण केंद्रीय भलायकी सचिवां कडेनूय चर्चा करतलों अशी म्हायती तांणी दिली.
काणकोणच्या वाडपी किडणी दुयेतींचो आंकडो निश्चीतूच चिंता करपा सारकोच आसा. काणकाोणा असले दुयेंती वाडपाचें कारण राष्ट्रीय एजन्सी वरवीं सोदतले. तशेंच केंद्रीय भलायकी सचिवां कडेनूचय चर्चा करतलों अशें मंत्री राणे हांणी सांगलें. जे किडणेचे दुयेंती डायलेसिसचो उपचार घेतात तांची सरकार योग्य तरेन काळजी घेता. विवीध विभागांनी डायलेसीस सेंटर्स उबीं करून थंय दुयेतींचेर फुकट उपचार करतात, अशेंय मंत्री राणे हांणी स्पश्ट केलें.
सभापती तशेंच काणकोणचे आमदार रमेश तवडकर हांणीय काणकोण म्हालांत किडणी कडेन संबंदीत दुयेंती मदीं वाड जावप म्हळ्यार चिंता करपा सारकी गजाल आशिल्ल्याचें तांणी स्पश्ट केलें. ह्या दुयेतींक योग्य तरेन उपचार मेळटले हाचे कडेन भलायकी खात्यान खरपणान लक्ष दिवपाची गरज आशिल्ल्याचें तांणी नमूद केलें.
सरकारी हॉस्पिटलांतल्या उण्या कर्मचार्यांचो मुद्दो आमदार डॉ. चंद्रकांत शेट्ये तशेंच विरोधी पक्ष फुडारी युरी आलेमाव हांणी मांडलो. खुबश्या समुदायीक हॉस्पिटलांनी जाय तितले दोतोर, नर्सी ना. ताचो फटको थळाव्यांक बसता असो दावो तांणी केलो. ताचेर उलयतना राज्यांत दोतोर खूब उणे आसात. राज्य सरकाराच्या धोरणांत बदल करून हेर राज्यांतल्या दोतोरांची नियुक्ती करपाची गरज आसा. तशेंच दोतोरांच्या पगारांतूय सुदारणा करची पडटली अशें मंत्री राणे हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
