भांगरभूंय | प्रतिनिधी
सगूण वाडकार: पर्ये मतदार संघा वतीन अटल बिहारी वाजपेयी जयंती मनयली
वाळपय: देशाचे आदले प्रधानमंत्री अटल बिहारी वाजपेयी हांचें देशा खातीरचें समर्पण विसरूंक जायना. ताणीं विंगड विंगड मळार आपली आदर्श प्रतिमा तयार केली. ताचे चिंतपाचे आनी वावुरपाचे पद्दतीक लागून पुराय देशाची उदरगत चालीक लागल्या. तांचे सारकी देशाक दिवपी आदराची भावना समाजा मदीं निर्माण जावप गरजेचें अशें होंडा जिल्हो पंचायत वांगडी सगूण वाडकार हांणी स्पश्ट केलें.
पर्यें मतदार संघ भाजपा मंडळा वतीन अटल बिहारी वाजपेयी जयंती निमतान आयोजीत कार्यावळींत ते उलयताले. वाळपयची आमदार डॉ. दिव्या राणे हांच्या कार्यालयांत हे कार्यावळीचें आयोजन केल्लें.
ह्या वेळार केरी जिल्हो पंचायत वांगडी देवयानी गांवस, मतदारसंघाचे भाजपाचे प्रभारी विनोद शिंदे, म्हाऊस पंचायतीचे सरपंच सोमनाथ काळे आनी विवीध पंचायतीचे पंच, सरपंच, भाजपाचे कार्यकर्ते आनी हेर हाजीर आशिल्ले.
अटल बिहारी वाजपेयी तीन फावटीं देशाचे प्रधानमंत्री जाले. प्रधानमंत्री म्हणून ताणीं आपल्या वावराचेर कसलीच तडजोड करूंक ना. जाल्यार देशाचे उदरगती खातीर जें करप शक्य आसलें तें तांणी करून दाखयलें. भारतीय जनता पक्षाची स्थापना, भारतीय जनसंघाची स्थापना हातूंत तांचो म्हत्वाचो वांटो आसा, अशें सगूण वाडकार हांणी फुडें सांगलें.
विनोद शिंदे हांणी ह्या वेळार आपले विचार मांडले. सुरवातेक अटल बिहारी वाजपेयी हांच्या फोटोक फुलांचो हार अर्पण करून आर्गां ओंपलीं.
कार्यावळीचें सुत्रसंचालन उदय सावंत हांणी केलें आनी तांणीच उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
