भांगरभूंय | प्रतिनिधी
देशांतल्या शिकिल्ल्या तरणाट्यांचो योग्य उपेग करून देशाक उदरगतीच्या उंचेल्या पावंड्यार घेवन वचूंक जाय, जाल्यार विद्यार्थ्यांक वाचनाची उर्बा दिवप गरजेचें.
आयच्या म्हायती तंत्रगिन्यानाच्या काळार कसलीय म्हायती थोड्या वेळा भितर मेळटा. जर मनशाकडेन बरी बुद्द, विचारांची ताक आसा, जाल्यार मनीस आपलें जीवित घडोवपाक शकता. सकारात्मक विचार आमकां बळगें दितात तशेंच योग्य वाट दाखयतात. सकारात्मक विचारांच्या मनशांची संगत आनी गुणात्मक वाचन तितलेंच म्हत्वाचें. पुस्तकां मनशाक जोडटात, शब्दांची सुंदरकाय वाचतना पळोवपाक मेळटा. वाचन हें ज्ञान मेळोवपाचे एक साधन. आताच्या म्हायतीप्रधान समाजांत जायतीं मुद्रण साधनां आनी अंकीकृत माध्यमां आसात. काळ जरी बदल्ला तरी वाचनाची आवड उणी जावंक ना. फरक इतलोच, पयलीं हातांत पुस्तक आसतालें, आताय आसाच, पूण पुस्तकां खेरीज डिजीटल माध्यमां, म्हायती पुरवण करपी संस्था, ई- ग्रंथालय, संगणक आदारीत सेवा लेगीत आसात.
भुरग्यांक वाचनाची गोडी लावपाचें, पयलें मार्गदर्शन दिवपाचें काम पालकांचें. भुरगेंपणात जशे पालक भुरग्यांच्या आवडी प्रमाण तांका आवडटा तेंच खेळणें वा कसलोय जिन्नस घेवन दितात, तेच प्रमाण आपल्या भुरग्यांची खंयच्या विशयांत रुची आसा त्या विशयातलें पुस्तक ताका भेट म्हण दिवपाचें काम पालकांचें आसता. जशी भुरग्या मदीं वाचनाची आवड निर्माण जाली कि ताका हेर भाशेंतलें, तशेंच वेगवेगळ्या विशयांतलें साहित्य दिलें जाल्यार ताचें गिन्यान वाडटलें.
शिक्षकान शिक्षणीक पावंड्यार सदांच विद्यार्थ्यांक वाचनाची सवय लागची हाचेर भर दिवपाक जाय. पाठ्यपुस्तकां खेरीज म्हायती दिवपी जी हेर साधनां आसात, ताचो वापर विद्यार्थ्यांनी आपलें गिन्यान वाडोवपाक करपाक जाय. तशेंच, नवो उपक्रम तयार करपाक तांका पोशक वातावरण दिवंक जाय. शिक्षकान स्वता ग्रंथालयाचो वापर तशेच संगणक नियंत्रित प्रवेश म्हायती भांडाराचो वापर करप म्हत्वाचें. शिक्षकान माध्यमांचेर वाचून आपल्या विशयांत नवें संशोधन जाता ताची म्हायती, आधुनिक घडणुकेंचें गिन्यान घेवचें. विद्यार्थ्यांक शिक्षकाची प्रेरणा आनी भुरग्यांक वाचन करपाची उर्बा मेळटली.
आयच्या ह्या तंत्रगिन्यानाच्या युगात ग्रंथपालाचें योगदान खूब म्हत्वाचें. विश्वव्यापी म्हायती यंत्रणेचेर एका क्लिकान भुरग्यांक म्हायती मेळटा, पूण ती म्हायती कितली गुणात्मक आसा, हें पारखूपाक शिकोवपाचें काम ग्रंथपालाचें. ग्रंथपालान भुरग्यांक योग्य वेळार, योग्य म्हायती आनी योग्य साधन दिवप गरजेचें. तशेंच, भुरग्यांक गुणात्मक आनी परिणामात्मक म्हायती हातूंतलो फरक पटोवन दिवप गरजेचें. विद्यार्थ्यां खातीर वेगवेगळ्या विशयांतली म्हायती मेळोवपाक म्हायती भांडारांच्यो साधन सुविधा आसात. ग्रंथपालान महाविद्यालयांत ऑरीएन्टैशन दितना ताचे विशीं म्हायती आनी मार्गदर्शन करूंक जाय. तशेंच विद्यार्थी प्रत्यक्षाततें वापरांत हाडटात काय ना हाचेर लक्ष दवरचें.
आमच्या देशाचो फुडार आयच्या विद्यार्थ्यांच्या हातांत आसा. राष्ट्राक प्रगतीचे दिकेन व्हरपा खातीर दर एका नागरिकाची म्हत्वाची भूमिका आसता. देशांतल्या शिकिल्ल्या तरणाट्यांचो योग्य उपेग करून देशाक उदरगतीच्या उंचेल्या पावंड्यार घेवन वचूंक जाय, जाल्यार विद्यार्थ्यांक वाचनाची उर्बा दिवप गरजेचें.
अदिती योगेश मळीक
8767921858
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
