भांगरभूंय | प्रतिनिधी
म्हापशें: गोंय पुलिशेच्या आतंकवाद विरोधी विभागाच्या (एटीएस) कमांडोनी शुक्रारा राती वागातोरां मॉक ड्रील कसरत केली. ह्या विभागाची रातच्या वेळार केल्लें हें पयलेंच मॉक ड्रील. हें मॉक ड्रील वागातोरच्या डब्ल्यू हॉटेलांत केलें.
ह्या मॉक ड्रीलांत हणजूणें पुलीस स्टेशनाचे कर्मचारी, बॉम्ब पोको करपी पंगड, शिवोली भलायकी केंद्राचे कर्मचारी आनी पणजी वायरलेस स्टेशनाच्या कर्मचाऱ्यांनी वांटो घेतलो.
ओलीस दवरिल्ल्यां सयत तीन बोगस आतंकवादी हॉटेलांत शस्त्रां सयत घुसले आनी तांणी मार्केटींग कार्यालयाचो ताबो घेतलो. हणजूणें पुलीस कर्मचाऱ्यांनी हॉटेलाक भायल्यान रेवाडो घातलो आनी लोकांचेर नियंत्रण दवरलें. तशेंच कोणाकूच ऑपरेशन वाठारांत वचपाक दिवंक ना. बॉम्ब पोको करपी पंगडान पुराय वाठाराची पळोवणी केली. अखेल मुळाव्या भलायकी केंद्राच्या कर्मचाऱ्यांनी ह्या मॉक ड्रिलाचो एक वांटो म्हूण किरकोळ जखमी जाल्ल्या कमांडोचेर मुळावे उपचार केले. वायरलेस स्टेशनाच्या कर्मचाऱ्यांनी वेळावेळार स्थितीचो नियाळ घेवन तांची जापसालदारकी प्रामाणीकपणान भुजार घेतली. निमाणे कडेन रातच्या ह्या मॉक ड्रिला मजगतीं आयिल्ल्या अडचणींचो नियाळ घेतलो. ह्या वेळार हॉटेलाचे कसलेच मालमत्तेचें लुकसाण जावपाक दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
