भांगरभूंय | प्रतिनिधी
प्राधिकरणाचे विनवणे वयल्यान मुरगांव पालिकेची कारवाय
भांगरभूंय । प्रतिनिधी
मुरगांवः राष्ट्रीय म्हामार्ग मांगुरहील, वरुणापुरी वास्को वाठारांत अतिक्रमण केल्ल्या बेकायदो फळ आनी भाजयेचे गाडे मुरगांव पालिके वतीन मोडले. ह्या राष्ट्रीय म्हामार्ग प्राधिकरणा वतीन वास्को येरादारी पुलिशेक मांगुरहील रस्त्याचे कुशीक अतिक्रमण केल्ले खातीर अवजड वाहनां वांगडाच हेर वाहनांक आडखळ करतात, अशी म्हायती खूब खेपे निवेदना वरवीं दिल्ली. हाका लागून येरादारी पुलिशेच्या आदेशा वरवीं पालिकेन पुलीस बंदोबस्तांत थंयचे सगळे फळ, भाजयांचे बेकायदो गाडे काडून उडयले.
मुरगांव पालिकेन शेनवारां 23 जुलयाक वास्को मांगुरहील वरुणापुरी राष्ट्रीय म्हामार्गाचे कुशीक बेकायदो उबारिल्ले सुमार चार फळ, भाजयाचें गाडे काडले. हे सगळे गाडे बिगर गोंयकारांनी उबारिल्ले. ह्या गाड्यांचेर पालिकेन खूब खेपे कारवाय केल्ली, तरी लेगीत ते परतून परतून थंय उबे जाताले. बेकायदो गाड्यांचेर कारवाय करतना पालिकेचे निरिक्षक योगेश देसाय, निरिक्षक प्रकाश हरिजन, पुलीस उपनिरिक्षक वर्षदा नायक, कामगार पालिका कामगार हाजीर आशिल्ले.
नौदळान केल्ल्या अतिक्रमणाचेर अजून कारवाय ना
मांगुरहील आनी वरुणापुरी वोल्ताचेर नौदळान राष्ट्रीय म्हामार्गाचेर अतिक्रमण केलां. प्राधिकरणान हाचेर अजून कसलीच कारवाय करूंक ना. केंद्रीय रस्तो येरादारी मंत्री नितीन गडकरी हांणी नौदळान म्हामार्गाचेर केल्ल्या अतिक्रमण केल्ले सुवातेचेर ताकतिकेन कारवाय करपाचे आदेश संबंदीत विभागाक दिवन लेगीत कारवाय करूंक नाशिल्ल्यान वाहन चालकांनी नाराजी उक्तायल्या. नौदळान राष्ट्रीय म्हामार्गाचेर सोबितीकरण करून म्हामार्गाचे नेम मोडल्यात. तरी लेगीत कारवाय करपाक राष्ट्रीय म्हामार्ग प्राधिकरण वेळ काडटा, अशी टिका थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
