भांगरभूंय | प्रतिनिधी
शांतादुर्गा उच्च माध्यमीक विद्यालयाच्या प्रशासनाचो निर्णय
दिवचलः इकरावेच्या वर्गांत ‘पेपर स्प्रे’ मारपी पांचूय विद्यार्थ्यांक शांतादुर्गा उच्च माध्यमीक विद्यालयाच्या प्रशासनान एका म्हयन्या खातीर निलंबीत केल्यात. शुक्रारा सकाळीं जाल्ले बसकेंत हो निर्णय घेतलो. ह्या प्रकरणाची चवकशी सुरू आसा. स्वास घेवपाक 12 विद्यार्थ्यांक त्रास जाल्ल्यान तांकां दिवचल आनी आझिलो हाॅस्पिटलांत दाखल केल्ले. सांजे उसरां 11 जाणांक उपचारा उपरांत डिस्चार्ज दिल्लो. जाल्यार एका विद्यार्थीनीक फुडल्या उपचारा खातीर गोमॅकाँत दाखल केल्ली. तिची भलायकी सुदारता.
दिवचलेंतल्या शांतादुर्गा उच्च माध्यमीक विद्यालयांतल्या इकरावेच्या वर्गांत बिरेस्तारा चार विद्यार्थ्यांनी पेपर स्प्रे मारिल्ल्यान 12 विद्यार्थीनींक स्वास घेवपाक त्रास जाताले. तांकां उपचारा खातीर पयलीं दिवचल भलायकी केंद्रांत आनी उपरांत 9 विद्यार्थीनींक म्हापश्यां आझिलो हॉस्पिटलांत दाखल केल्ले. पुलिसांच्या तपासांत त्याच विद्यालयांतल्या 5 विद्यार्थ्यांनी पेपर स्प्रे वर्गांत फवारिल्ल्याचे स्पश्ट जाल्ले.
शुक्रारा सकाळीं शिक्षण खात्याचे उपसंचालक मनोज सावयकार, शालेय वेवस्थापन मंडळ आनी पालक-शिक्षक संघाचे पदाधिकारी हांची बसका जाली. सावयकार हांणी वर्गाची पळोवणी करून शिक्षक आनी हेरां कडेन चर्चा केली. बसके उपरांत मंडळाचे अध्यक्ष विजय सरदेसाय हांणी पांचूय विद्यार्थ्यांक एका म्हयन्या खातीर निलंबीत केल्ल्याचे सांगलें.
मजगतीं, शिक्षण खात्याच्या आदेशा प्रमाण, ह्या प्रकरणाच्या चवकशे खातीर वयल्या पांवड्या वयल्या समितीची नेमणूक केल्या. समिती तपासा उपरांत अहवाल सादर करतले.
मजगतीं, राज्यसभा खासदार सदानंद शेट तानवडे हांणीय सकाळीं विद्यालयाक भेट दिवन म्हायती घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
