भांगरभूंय | प्रतिनिधी
सांखळेच्या खेडेकर सभाघरांत महादेवाच्या पुस्तक प्रकाशनाक वचपाक जाय. सत्तरीचो पूत आपल्या बळग्यार खर कश्टान मुखार सरला. कोणाच्या लग्न कार्याक वतात तशी महादेवाच्या पुस्तक विमोचन वचपाचो पापाचो आग्रह. महादेवाच्या सुपक कल्पनेंतल्यान निर्माण जाल्ल्या वझऱ्याचो दिश्टावो घेवपाक पुस्तक प्रकाशन सुवाळ्याक पावलीं. कोण व्हड नावाजत्या ज्येश्ठ कवीच्या पुस्तक विमोचन सुवाळ्याक आसता तितली उपाट गर्दी. “वझरो” घसघसोवपी नव्या युगाचो कवी महादेव आनी तांणी म्हणिल्ले आपल्या मनाचे उमाळे “कोणी तरी म्हाका विचारले तुवें कितें जोडलें? हांवें पयशे न्हय मनां जोडलीं, मनशां जोडलीं. मनीस कमयले. बरोवप्यान खरेच भरपूर मनशां जोडल्यांत हें भरिल्लें सभाघर पळोवन समजतालें.
“वझरो” काव्यसंग्रह 21व्या शेंकड्याच्या समाजाचें पडबिंब. कवितेची भाशा सामकी सरळ. महादेवाची कविता आमी कवी संमेलनांनी आयकल्यात. फेसबूकाचें पिशें” कविते खातीर म्हादेव गोंयभर फामाद. कवी कविता बरोवपाक तसोच कविता वाचनाकय तरबेज. महादेवाच्या कविता सादरीकरणांत आमी धालो आनी फुगडी पयलेच फावट आयकल्यो.
सत्तरींतल्या होंडा गांवचे लोकसंस्कृतायेंत पोसवण जावन तयार जाल्ल्यो महादेवाच्यो कविता गोंय विद्यापीठ ताळगांव मेरेन गाजल्यात. वझरो कविता संग्रहाचें खाशेलपण म्हणल्यार वेग-वेगळ्या विशयांक धरून म्हादेव कवन रचता पूण ताची मूळ मातयेंत घट्ट धरून आसात.कवी तरनाटो म्हणटकच ताच्यो मोगाच्यो कविताय तितल्योच मोगाळ.
“यो गो मोगा
यो गो मोगा
तोडून सगळे पास
काळजाक फकत लागल्या
तुज्या मोगाची गो आस
हे कवितेंत कवी मोगी मोगिकेच्या मनांतल्यो भावना शब्दांनी मांडटा. कविता वाचतना कवी मोगी मोगिकेच्या मनांतल्यो भावना शब्दांनी मांडटा. कविता वाचतना जितली उमेद तितलीच हाका संगिताची सांगाताची साथ मेळत जाल्यार
महादेवाची “कुकमाचो धनी” वाचतना आंगार कांटो येता.
पदराक दोन भुरगीं
घरांत एकटीच जोडपी
घोव सदांच पिवन
वाड्यार बोवाळ घालपी
निमणेक कविता सोंपयतना कवी म्हणटा.
कसले पाप केले हांवें
म्हणून आयलो फाटीक शनी
नांवा पुरतोच घोव फकत
हो कुकमाचो धनी
एके बायल मनशेक कितल्या तरी प्रसंगाक तोंड दिवन जगचें पडटा. कुकमाचो धनी कवितेंत कवी बायलेची व्यथा मांडटा. कवीचे विचार सखोल हें जाणवता. कुकमाचो धनी ही कविता समाजाचें पडबिंब. कवी मनान भावार्थी. लयराय, बसवेश्वर, गणपती, साईबाब अश्यो भावार्थान भरिल्ल्यो कविताय कवी मांडटा.
म्हादय कवितेंत कवी समाजाक म्हणल्यार गोंयकारांक उलो मारता
कर्नाटक राज्यांतल्यान
घाटा वयल्यान देंवली गा
अशी एक न्हय नांव तिचें म्हादय
आमच्या खातीर ती दुसरी आवय.
सगळ्यो साहित्य मोग्यांनो, कवी महादेव गांवकार हाचो “वझरो” कविता संग्रह मुजरत विकत घेवन वाच्चो.
पुस्तक – वझरो
लेखक – महादेव गांवकार
प्रकाशक – आमचें दायज प्रकाशन
मोल – रू. 100/-
कात्यायनी कालिदास घाटवळ
9975293808
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
