वझरेचें उदक घुंवडावपाक विरोध

भांगरभूंय | प्रतिनिधी

वझरी नागरीक शेतकार कृती समिती; उपजिल्होधिकाऱ्याक, मामलेदाराक निवेदन

भांगरभूंय । प्रतिनिधी

पेडणें: वझरी पंचायत वाठारांतलें उदक दुसरे कडेन घुंवडावपाक आमचो खर विरोध आसा, अशा आशयाचें निवेदन वझरी नागरीक शेतकार कृती समितीन पेडणें उपजिल्होधिकारी, पेडणें मामलेदार हांकां 30 नोव्हेंबराक भेटयलें.

वझरी पंचायत वाठारांतल्या शेतकारांक विस्वासांत घेनासना व्हड प्रमाणांत शिंपणावळ खात्या वरवीं उदकाची पायपलायन घालून मोपा विमानतळाक उदक दिवपाचो यत्न चल्ला. ह्या प्रकाराक आमचो विरोध आसा. सरकारान हातूंत लक्ष घालून हो प्रकार ताकतिकेन बंद करचो. आमचे खाजगी जमनींत आशिल्ल्या चिऱ्यां खणींतलें उदक आमी दुसरे कडेन घुंवडावपाक दिवचे नात, अशें ह्या निवेदनांत म्हणलां.

वझरी पंचायत वाठारांतल्या खाजगी जमनींत खूब प्रमाणांत चिऱ्यां खणी आसात. तातूंत व्हड प्रमाणांत उदकाचो सांठो आसा. थळाव्या शेतकारांक विस्वासांत घेनासतना शिंपणावळ विभाग पायपलायनी वरवीं हें उदक मोपा विमानतळा खातीर घुंवडावपाचो यत्न करता, ही दुखदिणी गजाल, अशें शेतकारांनी म्हणलां. दोंगराळ वाठारांत ह्यो चिऱ्यां खणी आसात. तातूंत व्हड प्रमाणांत पावसाचें उदक सांचता. ताका लागून ह्या वाठारांतल्यो बायों आनी शेतकारांच्या जमनीर वर्साचे बाराय म्हयने उदक आसता. ह्याच उदकाचेर शेतकार विवीध तरांचे पीक घेता. हो प्रकार ताकतिकेन बंद केलो ना जाल्यार आमकां रस्त्याचेर येवन आंदोलन करचें पडटलें. ते आदीं लोकशायेच्या मार्गान आमी लेखी निवेदन दिलां. सरकारान जर हो प्रकार असोच चालू दवरलो जाल्यार फुडल्या परिणामांक शेतकार जापसालदार आसचे नात, अशी शिटकावणी शेतकारांनी दिल्या.