भांगरभूंय | प्रतिनिधी
भांगरभूंय I प्रतिनिधी
पणजी : पुलिसां कडल्यान वकीलाक जाल्ले कथीत मारपेट प्रकरणांत खंडपिठान सरकाराक सविस्तर प्रतिज्ञापत्र सादर करपाचे निर्देश दिल्यात. प्रतिज्ञापत्र 20 डिसेंबर मेरेन सादर करप बंधनकारक आसा. प्रतिज्ञापत्र सादर केले उपरांत 21 डिसेंबराक याचिकेचेर सुनावणी जातली. खंडपिठान अॅड. सुबोध कंटक हांची अॅमिकस क्युरी म्हूण नेमणूक केल्या.
वकील संघटणेचे धरणें आंदोलन आनी कारवायेच्या मागणेक लागून वकीलाक पुलिसां कडल्यान जाल्ले मारपेट प्रकरण चिगळ्ळे. अॅड. गजानन सावंत हांकां पुलिसांनी मारपेट केल्ल्याची कागाळ तांणी नोंद केल्या. वकील संघटणेन निदर्शनां करपा सयत मंगळारा मुख्यमंत्री डॉ. प्रमोद सावंत हांची भेट घेतली. सरकारान मारपेट प्रकरणांत चार पुलिसांक निलंबीत केल्या. हाचे उपरांत वकीलांनी धरणें आंदोलन फाटीं घेतलें. ते भायर ह्या प्रकरणाची खंडपिठान दखल घेवपाची मागणी वकीलांनी न्यायाधीशा मुखार केली. खंडपिठान हाची स्वेच्छा दखल घेवन सुनावणी घेतली.
खंडपिठान पुलीस म्हासंचालक, गुन्यांव फांट्याचे पुलीस अधिक्षक, पर्वरी पुलीस स्टेशनाचे निरिक्षक तशेंच मारपेटीचो आरोप आशिल्ल्या 4 पुलिसांक नोटिसो जारी केल्यात. तशेंच सरकाराक पुराय प्रकरणाची म्हायती दिवपी प्रतिज्ञापत्र सादर करचे पडटलें. खंडपिठाक याचिकेंत मजत करपा खातीर अॅड. सुबोध कंटक हांची अॅमिकस क्युरी म्हूण नेमणूक जाल्या. सरकाराच्या प्रतिज्ञापत्रा उपरांत बऱ्योच गजाली स्पश्ट जातल्यो, अशें अॅड. सुबोध कंटक हांणी
सांगलें.
अशीलाच्या पर्वरींतल्या फ्लॅटाची पळोवणी करपाक गेल्ले कडेन अॅड. गजानन सावंत हांकां मारपेट जाली. वकीलांच्या धरणें आंदोलना उपरांत हवालदार संदीप परब, पुलीस शिपाय महादेव नायक, अमृत नागवेंकार आनी मार्कुस गोम्स हांकां निलंबीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
