भांगरभूंय | प्रतिनिधी
-मडगांव-मंगळुरू वंदे भारत गाडयेचो शुभारंभ
मडगांवः 2014 उपरांत रेल्वेच्या सुविधानी मोट्या प्रमाणांत सुदारणा जाल्या. रेल्वे स्टेशन, इमारती आनी सुविधा, विद्युतीकरण, नवे मार्ग आनी नव्याे रेल्वे सुरू केल्यात. सर्वसामान्यांक विमानतळार मेळपी सुविधा प्रमाण उण्या खर्चांत सुविधा उपलब्ध करून दिल्यात. हाचो फायदो गोंयांतल्या पर्यटन वाडी सयत अर्थीक सुबत्ता वाडी खातीर जातलो, अशें खासदार तानावडे हांणी म्हणलें.
मडगांव ते मंगळुरू ‘वंदे भारत’ रेल्वेचो प्रधानंमंत्री नरेंद्र मोदी हांचे हस्तुकीं अयोध्येंतल्यान आभासी पद्दतीन शुभारंभ जालो. ह्या वंदे भारत गाडयेक लागून गोंय आनी मंगळुरू ह्या दोनूय वाठारांत पर्यटन आनी वेवसाया खातीर येवप्यांची बरी वेवस्था जातली. तशेंच मंगळुरूच्यान वंदे भारत गाडी मडगांवां पावले उपरांत मुंबयंत वचपाक दुसरी वंदे भारत गाडी आसा. ताका लागून गोंया सयत मुंबयचो प्रवास फास्ट जावन हाचो फायदो मंगळुरू सयत गोंयच्या लोकांक जातलो, अशें दक्षीण मंगळुरू शार मतदारसंघाचे आमदार वेदव्यास कामथ हांणी सांगलें.
मंगळुरूचे खासदार नलीन कुमार कटील ह्या वेळार हाजीर अाशिल्ले. तशेंच खासदार सदानंद शेट तानावडे, मडगांवचे आमदार दिगंबर कामत हाजीर आशिल्ले.
बेगिनूच मंगळुरू -कोची, वंदे भारत एक्स्प्रेस 15 दिसांत सुरू जातली. उपरांत मंगळुरू बेंगलोर वंदे भारत गाडी सुरू जातली, अशें कामथ हांणी सांगलें.
रेल्वेचो स्वतंत्र अर्थसंकल्प करिनासतना एकूच अर्थसंकल्प केला. हाचो फायदो रेल्वेच्या सुदारणांत वाड जाल्या. मडगांव रेल्वे स्टेशन वाठार आनी इमारतीची बेगिनूच उदरगत जातली. कोंकण रेल्वो भारतीय रेल्वेंत आस्पाव करपाचो निर्णय हो केंद्राचे अखत्यारीत येता, ताचे सध्या मत उक्तावण योग्य नाशिल्ल्याचे खासदार सदानंद तानावडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
