लोहिया मैदानाच्या माचयेचो विस्तार करून भौशीक सुविधा स म्हयन्यात उपलब्ध करच्यो ः युरी आलेमाव

भांगरभूंय | प्रतिनिधी

मडगांव, प्रतिनिधी ः लोहिया मैदानाच्या नूतनीकरणा खातीर सरकारान सुमार तीन कोटी रुपया खर्च केल्यात. दुर्दैवान नियोजनाचो उणाव आनी घटमूट कामाक लागून हें इतिहासीक थळ वापरपी सगळ्यांची गैपसोय जाल्या. सरकारान पॉवर ट्रान्सफॉर्मर काडून उडोवचो. माचयेचो विस्तार करून भौशीक सुविधा बेगोबेग निर्माण करच्यो अशी मागणी विरोधी फुडारी युरी आलेमाव हांणी केल्या. तशेंच स म्हयन्यां भितर कामां पुराय जावंक ना जाल्यार आंदोलन करपाची शिटकावणी दिल्या.
गोंय प्रदेश काँग्रेस समितीन आयोजीत केल्ल्या गोंय क्रांती दीस कार्यावळींत डॉ. राम मनोहर लोहिया हांच्या पुतळ्याक आनी हुतात्मा स्मारकाक आर्गा ओंपल्या उपरांत तें उलयताले. हे वेळार काँग्रेस अध्यक्ष अमित पाटकार, केपेंचे आमदार एल्टन डिकोस्ता, दक्षीण गोंयचो खासदार कॅप्टन विरियातो फर्नांडीस, वरिश्ठ उपाध्यक्ष एम.के. शेख आनी हेर हाजीर आशिल्ले.
राज्याची राखण करपाक भाजपा सरकाराक अपेस आयलां. गोंयच्या रस्त्यांची वायट स्थिती आशिल्ल्यान दर दिसा एकल्याक मरण येता. सरकार इव्हेंट कार्यावळी आयोजीत करपाक व्यस्त आसा. ह्या अयोग्य सरकारा आड आनीक एक क्रांती सुरू करपाचो वेळ आयला अशें काँग्रेसीचे अध्यक्ष अमित पाटकार हांणी म्हणलें.

सरकाराच्या चुकीच्या धोरणांक लागून गोंयचें पर्यावरण आनी अस्मिताय खूब उणी जाल्या. स्वातंत्र्य झुजाऱ्यांच्या बलिदानांतल्यान मुक्त जाल्ली ही सोबीत भूंय वाचवपा खातीर आमी एकवटीत जावया अशें दक्षीण गोंयचे खासदार कॅप्टन विरियातो फर्नांडिस हांणी सांगलें.
हाचे आदीं सगळे काँग्रेसीचे फुडारी डॉ. राम मनोहर लोहिया हांच्या पुतळ्याक आनी हुतात्मा स्मारकाक फुला अर्पण करून आर्गा ओंपली. वरिश्ठ उपाध्यक्ष एम. के. शेख हांणी येवकार दिलो आनी दक्षीण गोंय जिल्लो अध्यक्ष सावियो डिसिल्वा हांणी उपकार मानले. ह्या वेळार महिला काँग्रेस अध्यक्ष बिना नायक, जिल्लो पंचायत वांगडी मिशेल रिबेलो, सरचिटणीस एव्हरसन वालीस हांचे सयत काँग्रेसीचे अधिकारी आनी कार्यकर्ते व्हड प्रमाणांत हाजीर आशिल्ले.