लोकोत्सवांतल्यान गोंयची संस्कृताय तिगून उरतली

भांगरभूंय | प्रतिनिधी

राज्यपाल हांचें हस्तुकीं उक्तावणः आमोणें- काणकोणां लोकोत्सवाक सुरवात

भांगरभूंय । प्रतिनिधी
काणकोणः आदर्श युवक संघान आमोणें- पैंगिणी आयोजीत केल्ल्या सात दिसांच्या 22व्या लोकोत्सवाचें उक्तावण गोंयचे राज्यपाल पी एस श्रीधरन पिल्लई हांणी केलें. लोकोत्सवाच्या माध्यमांतल्यान गोंयची संस्कृताय तिगोवन दवरपाचें काम सभापती रमेश तवडकार आनी तांचे सांगाती करतात ही सामकी बरी गजाल आसा असो अभिप्राय तांणी दिलो.
उक्तावण कार्यावळीक मुख्यमंत्री डॉ. प्रमोद सावंत, सभापती रमेश तवडकार, बांदकाम मंत्री नीलेश काब्राल, आमदार उल्हास तुयेंकार, प्रेमेंद्र शेट, प्रवीण आर्लेकार, दाजी साळकार, बिहारची आमदार निकी हेम्ब्रावन, काणकोणचे नगराध्यक्ष रमाकांत नायक गांवकार, प्रदेश भाजपा अध्यक्ष सदानंद शेट तानावडे, काणकोण भाजप मंडळ अध्यक्ष विशाल देसाय, आदले उपमुख्यमंत्री

बाबू कवळेंकार, भाजपाचे फुडारी सतीश धोंड, व्ही सतीश, सरपंच प्रिजल बांदेकार, पैंगिणीची सरपंच सविता तवडकार, गोविंद पर्वतकार हाजीर आशिल्ले. राज्यपालान दिवली पेटोवन लोकोत्सवाचें उक्तावण केलें.
लोकोत्सवा सारक्या माध्यमांतल्यान तरणाटी पिळगी गोंयची संस्कृताय तिगोवन दवरतली. जी-20 देशाचे परिशदेच्यो आठ बसका गोंयांत जातल्यो. ते खातीर येवपी मानेस्तांक तशेंच गोंयांत व्हडा संख्येन पर्यटक येतात तांकां आमच्या संस्कृतायेची झलक पळोवपाक मेळटली. काणकोण म्हालांत अध्यात्मीक पर्यटनाचेर भर दितले. अन्न प्रक्रिया उद्देग सुरू करतले. तरणाट्यांक आत्मनिर्भर करपाचें प्रधानमंत्री नरेंद्र मोदी हाचें सपन पुराय करपाक सगल्यांनी सहकार्य दिवचें अशें मुख्यमंत्री डॉ. सावंत हांणी ह्या वेळार मागलें. सभापती रमेश तवडकार आनी आदर्श युवक संगाचे वावुरपी धडपडी वृत्तीन काम करतात म्हणून लोकोत्सव येसस्वी जाता. आदिवासी फुडारी भगवान बिरसा मुंडाची जयंती मनोवपाक 70 वर्सां लागलीं. तांचो पुतळो उबारपाचें काम प्रधानमंत्री नरेंद्र मोदी हांणी केलें अशें तांणी नमूद केलें.
लोकोत्सवाचें बरे तरेन आयोजन केल्ले खातीर सदानंद शेट तानावडे हांणी आयोजकांची तोखणाय केली. तरणाटे आनी बायलांक स्वयंपूर्ण करपा खातीर कार्यावळी चालीक लायिल्ले खातीर तांणी आयोजकांक परबीं भेटयली. कार्यकर्त्यां कडल्यान निधी घेवन गरीबां खातीर घरां बांदप ही खोशयेची गजाल. ताका आमच्या पक्षाचो पुराय तेंको आसतलो अशें जाहीर करतना संस्कृताय तिगोवन दवरपाची माची म्हणल्यार लोकोत्सव अशें तांणी सांगलें. काणकोणांतल्या लोकोत्सवा सारको उत्सव आपूण बिहारांत घडोवन हाडपाची इत्सा बिहारच्या एसटी मोर्चाचे पदाधिकारी आनी आमदार निकी हेम्ब्रावन हांणी उक्तायल्या. मंत्री निलेश काब्राल हाचेंय ह्या वेळार भाशण जालें.
राज्यपाल आनी मुख्यंत्र्यांचे हस्तुकीं लोकोत्सवांतल्या वेगवेगळ्या दालनांचें उक्तावण जालें. ह्या वेळार वेगवेगळ्या मळार वावुरपी मानेस्तांचो मुख्यमंत्र्यांचे हस्तुकीं शाल, मानपत्रां भेटोवन भोवमान केलाे. डॉ. दिपा कुरैय्या आल्फोन्सो, स्टेफीन फर्नांडीस, उत्तम पार्सेकार, दीपक सिन्हा, पांडुरंग वझे, डॉ. साईनाथ वायंगणकार, डॉ. संगम कुराडे, विजय सक्सेना, अॅड. नारायण नार्वेकार, मनोज सावयकार, प्रवीण प्रकाश गांवस, पी. ए. सूर्यवंशी हांचो ह्या वेळार भोवमान जालो. ह्या मानेस्तांची वळख अरविंद कूटकार, आनंद देसाय हांणी करून दिली.
सुरवातेक बलराम शिक्षण संस्थेच्या विद्यार्थ्यांनी येवकार गीत सादर केलें. कार्यावळीचें सुत्रसंचालन प्रसाद पागी आनी सेल्झा गोन्साल्वीस हांणी केलें.
1995 वर्सा आदर्श युवक संघाची स्थापणूक केली. शिक्षणा बगर पर्याय ना हो मुद्दो धरून बलराम शिक्षण संस्थेची स्थापणूक केली. शेतकऱ्यां खातीर शेतकी संस्था सुरू केली. सगल्यांक वांगडा घेवन काणकोणची उदरगत करपाची आसा. फुडाराक गरीबां खातीर 100 घऱां बांदपाचें काम करतलो. 2030 मेरेन कोणकोणचो एकूय मनीस गरीब उरचो ना. काणकोणाक म्हाका ‘रोल मॉडेल’ करपाचें आसा अशेंय तवडकार हांणी सांगलें.

काणकोणची उदरगत होच ध्यासः तवडकार
2030 मेरेन काणकोण एक आदर्श तालुको जाल्लो पळोवपाक जाय. हांव कसलेच सर्तींत ना. काणकोणची सर्वांगी उदरगत होच म्हजो ध्यास, अशें लोकोत्सव समितीचे अध्यक्ष आनी सभापती रमेश तवडकार हांणी आपल्या येवकाराच्या भाशणांत सांगलें.