भांगरभूंय | प्रतिनिधी
भांगरभूंय । प्रतिनिधी
दिवचलः जनता दरबारांत दरेका सरकारी खात्यान आपलें रिपोर्ट कार्ड सादर करून लोकांच्यो समस्या आसात त्यो ताकतिकेन सुटाव्यो करपाक तयार रावपाक जाय. साबार लोकांचे प्रश्न बेगोबेग सुटावे करपा खातीर लोकप्रतिनिधी आनी लोकां कडेन समन्वय सादपाक जाय अशें साखळे हांगा आयोजीत केल्ल्या जनता दरबारांत उदका स्रोत मंत्री सुभाष शिरोडकार हांणे सांगलें.
गोंय सरकारा वतीन साखळेच्या रवींद्र भवनांत आयोजीत केल्ल्या ह्या जनता दरबारांत लोक कमी आनी सरकारी अधिकारी चड अशी स्थिती आशिल्ली. लोकप्रतिनिदी आनी सरकारी अधिकारी हाचें मदीं जावपी जाग्रुती हातूंतल्यान उदरगतीक चालना मेळटा. जनता दरबाराच्या माध्यमांतल्यान देरका गांवातले उदरगतीक नेट दिवपाक जाता, लोकप्रतिनिधींनी जाग्रुत रावन उदरगतीक चालना दिवपाचें आवाहन शिरोडकार हांणी ह्या वेळार केलें.
सरकारी अधिकाऱ्यांनी खंयचे प्रश्न सुटावे केलें हाचेर चर्चा करून रावनास्तना दरेक प्रश्न निकालांत काडचे. पोरणी दुखणी तशींच दवोरची न्हय. प्रश्न सुटावे जायनात जाल्यार जनता दरबारांचो कांयच उपेग ना अशेंय शिरोडकार हाणे सांगले. गोंयांत पंचवीस लोकां फाटल्यान एक सरकारी अधिकारी अशें प्रमाण आसा. राज्याचे उदरगतींत तांचो वांगडो सामको म्हत्वाचो आसा अशें ताणे सांगलें.
ह्या जनता दरबारांत दिवचलचे आमदार डॉ चंद्रकांत शेट्ये, मयेंचो आमदार प्रमेंद्र शेट, उत्तर गोंय जिल्होधिकारी मामू हागे, साखळेची नगराध्यक्ष रश्मी देसाय, दिवचलचे नगराध्यक्ष कुंदन फळारी, जिल्हो पंचायत वांगडी महेश सावंत, प्रदीप रेवोडकार, गोपाळ सुर्लकार, उत्तर गोंय पुलीस अधिक्षक निधीन वाल्सन, उपजिल्होधिकारी रोहन कासकार, मामलेदार राजाराम आनी हेर खात्यांचें अधिकारी हाजीर आशिल्ले.
सामाजीक लागणूक म्हणून सरकारी अधिकाऱ्यांनी लोकांचे प्रश्न जाता तितल्या बेगीन सुटावे करपा कडेन लक्ष दिवपाक जाय अशें डॉ चंद्रकांत शेट्ये हाणे दरबारांत सांगलें. लोकप्रतिनिधी आनी सरकारी अधिकाऱ्या मंदी बरो समन्वय आसल्यार उदरगत बरे भेशन जावपाक शकता अशें प्रमेंद्र शेट हाणे सांगलें. ह्या दरबारांत चडशे सरपंच वा पंचायत वांगडी हाजीर नाशिल्ले. लोक वा लोकप्रतिनिधी परस सरकारी अधिकारी चड दिसताले. लोकाचे उणे उपस्थिती कडेन पळोवन एक तर तांचीं कामां जाल्यांत व तांका दरबाराची सूचोवणी मेळूंक ना अशें दिसतालें. दरबारांत जाल्ल्या कामांचो तपशील सादर करपाची सूचोवणी मंत्री सुभाष शिरोडकार हाणे सरकारी अधिकाऱ्यांक केल्या.
——————————————————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
