भांगरभूंय | प्रतिनिधी
-प्रभारी माणिकम टागोर हांणी मुखेल फुडाऱ्यांच्यो घेतल्यो भेटी
पणजी : लोकसभा वेंचणुके खातीर फक्त चार ते पांच म्हयने उरल्यात. काँग्रेसीन गोंयांतली तयारी सुरू केल्या. तेच फाटभुंयेर गोंयांत आयिल्ल्या काँग्रेस प्रभारी माणिकम टागोर हांणी शुक्रारा दोनूय मतदारसंघांतले उमेदवार थारावपाचे नदरेन दोनूय मतदारसंघांतल्या फुडाऱ्यांच्यो वैयक्तीक भेटी घेतल्यात. तांचे कडेन चर्चा केल्या. पूण, उमेदवारांची घोशणा निमाण्या टप्प्यात आशिल्ल्याची म्हायती पक्षांतल्या सुत्रांनी दिली.
विधानसभा वेंचणुके उपरांत फक्त 6 म्हयन्यांत काँग्रेसीचे आठ आमदार भाजपांत दाखल जाले. ते उपरांत प्रदेश काँग्रेसीची परतून एकदा निर्शेवणी जाली. उपरांत गिरीश चोडणकार हांणी प्रदेशाध्यक्षपदाचो राजिनामो दिले उपरांत युवा फुडारी अमीत पाटकार हांची प्रदेशाध्यक्षपदार नेमणूक केली. तशेंच, माणिकम टागोर हांचे कडेन प्रभारी म्हूण जापसालदारकी दिली. फाटल्या विधानसभा आनी लोकसभा वेंचणुकांचो धडो घेवन हे खेपे काँग्रेस लोकसभा वेंचणुकीचे उमेदवार बेगीन घोशीत करून प्रचाराक सुरवात करतली, अशें पक्षाच्या कार्यकर्त्यांक दिसताले. पूण, काँग्रेसीन लोकसभा वेंचणुकेक फक्त चार-पांच म्हयने उरिल्ल्यान आतां हे विशींच्यो हालचाली सुरू केल्यात. ताका लागून उमेदवार निमाण्या टप्प्यांत जाहीर करतले, अशें पक्षाच्या एका ज्येश्ठ फुडाऱ्यान सांगलें.
लोकसभा वेंचणुकेच्या तयारेचे फाटभुंयेर गोंयांत आयिल्ल्या टागोर हांणी शुक्रारा उत्तर आनी दक्षीण ह्या दोनूय मतदारसंघांतल्या म्हत्वाच्या काँग्रेस फुडाऱ्यांची वैयक्तीक भेट घेवन चर्चा केली.
सध्याचे स्थितींत उत्तर गोंयांतल्यान आदले केंद्रीय मंत्री अॅड. रमाकांत खलप, आदली मंत्री निर्मला सावंत आनी ज्येश्ठ फुडारी विजय भिके, जाल्यार दक्षीण गोंयांतल्यान आदले प्रदेशाध्यक्ष गिरीश चोडणकार आनी कॅ. विरयातो फर्नांडीस हांच्या नांवांचो लोकसभे खातीर पक्षान विचार चलयला. हातूंतल्या एका फुडाऱ्याचें नांव उमेदवार म्हूण निमाण्या वेळार दिल्लींतल्यान जाहीर जातले. ही प्रक्रिया लोकसभा वेंचणूक जाहीर जाले उपरांतूच जातली, अशेंय एका फुडाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
