भांगरभूंय | प्रतिनिधी
– नीरजा चौधरीः बांदोडकार अध्यासनांत प्रधानमंत्र्यांच्या कार्यपद्दतींचेर व्याख्यान
पणजी : हिंदुत्व हो प्रधानमंत्री मोदी आनी भाजपाचो अजेंडा आसलो तरी ओबीसी आनी मागास मुस्लिमांक खुश करपाचें सध्याचे धोरण आसा. विधानसभा वेंचणुकेंत भाजपाक ओबीसी तशेंच मागास मुस्लिमांचीं मतां मेळ्ळ्यांत. आतां लोकसभा वेंचणुकेंत ओबीसी आनी मुस्लिमांचीं मतां निर्णायक थारतली, अशें ज्येश्ठ पत्रकार नीरजा चौधरी हांणी सांगलें.
गोंय विद्यापिठांत बांदोडकार अध्यासनांत ज्येश्ठ पत्रकार नीरजा चौधरी हांची व्याख्यानाची माळ सुरू आसा. देशांतल्या सध्याच्या राजकारणाचेर व्याख्यान दितना बिरेस्तारा तांणी व्ही. पी. सिंग आनी अटलबिहारी वाजपेयी हांच्या प्रधानमंत्री पदाच्या कारकिर्दीचेर उलोवप केले.
प्रधानमंत्री नरेंद्र मोदी हांचे फुडारपणा खाला भारतीय जनता पक्ष बरोच घटमूट आसा. भाजपाचे तुळेंत काँग्रेस पक्ष कांय प्रमाणांत दुबळो आसा. ओबीसी आनी मुस्लिमांचीं मतां कशी मेळटली? हाची व्युहरचना भारतीय जनता पक्ष तयार करता. विधानसभा वेंचणुकेंत ओबीसी (हेर मागासवर्गीय) आनी मागास मुस्लिमांचीं मतां भाजपाक मेळ्ळ्यांत. हिंदुत्ववादी पक्ष आसलो तरी ओबीसीं खातीर सवलती दिवप सुरूच आसा. लोकसभा वेंचणुकेंत हिंदूंच्या मतां सयत ओबीसी आनी मुसलमानांचीं मतां निर्णायक थारतली. देशांत भोवसंख्य जनता हिंदू आसा. हिंदुंची 40 ते 45 टक्के मतां आनी ओबीसी, मुस्लिमांचीं मतां मेळोवन भोवमताचो टप्पो गांठपाचें भाजपाचें नियोजन आसा. हातूंत तांकां येस येता वा ना? हाचेर फुडले सरकार थारतलें, अशें भाकीत तांणी केले.
प्रधानमंत्री नरेंद्र मोदी हांची सरकाराचेर आनी पक्षाचेर जबरदस्त पकड आसा. आदले प्रधानमंत्री सर्गेस्त राजीव गांधी हे लोकप्रीय आशिल्ले, तरी तांची लेगीत पक्षाचेर पयलीं सारकीं पकड उरली ना. हाका लागून 1989 च्या वेंचणुके उपरांत ते पक्षाक सत्तेर हाडपाक शकले ना. राजीव गांधी उपरांत व्ही. पी. सिंग प्रधानमंत्री जाले. प्रधानमंत्री म्हूण व्ही. पी. सिंग हे यादींत उरले ना, तरी तांणी इतिहास केलो. मागासवर्गीयांक नोकरी तशेंच शिक्षण संस्थांनी व्हड आरक्षण दिवपी मंडल आयोगाच्याे शिफारशी तांणी मान्य केल्यो. देशांत आंदोलन उबे रावलें. विरोध करपी विद्यार्थ्यांनी स्वताक उजो लावन घेतलो. ह्याच तेंपार भारतीय जनता पक्षान राम मंदिरा खातीर आंदोलन सुरू केल्लें. भाजपान तेंको काडिल्ल्यान तांचें सरकार कोसळ्ळें. त्याच तेंपार लालुप्रसाद यादव, मुलायमसिंग यादव अशें मागास फुडारी मुख्यमंत्री जाले. देशांत आनी राज्यांत आघाडी सरकारांचें पर्व सुरू जाले. आघाडी सरकारांचे पर्व सुरू जावपाक व्ही. पी. सिंग हे कांय प्रमाणांत जापसालदार आसात, अशें नीरजा चौधरी हांणी सांगलें.
प्रधानमंत्रीपदा परस व्यक्ती म्हूण चड प्रभाव
व्यक्तीमत्व आनी वक्तृत्वाक लागून अटलबिहारी वाजपेयी हे लोकप्रीय फुडारी आशिल्ले. प्रधानमंत्री पदा परस संसदेतलें तांचें कार्य आनी भाशणशैलीक लागून तांचो व्यक्ती म्हूण प्रभाव चड जाणवलो. तांच्या काळांत लाहोरांत थेट बस सेवा सुरू जाली. कारगील झुजांत पाकिस्तानाक भारतान शह दिलो. पाकिस्ताना कडचे संबंद सुदारपा खातीर आग्रा शिखर परिशद जाली. पोखरण अणू चांचणी तांचेच तेंपार जाली. भारत अण्वस्त्र सज्ज देश आशिल्ल्याचे तांणी संवसाराक सांगलें. तरी लेगीत काश्मीर प्रस्न सुटावो करपाक तांकां येस आयलें ना. पाकिस्ताना कडेन संबंद सुदारचे म्हूण तांणी यत्न केले. ताकाय येस आयलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
