भांगरभूंय | प्रतिनिधी
वेंचणुके खातीर भाजपाच्यो हालचालीः दामोदर नायक लेगीत उत्सूक
भांगरभूंय । प्रतिनिधी
पणजी : लोकसभा वेंचणुकेंत उत्तर गोंयांतल्यान भाजपाची उमेदवारी केंद्रीय मंत्री श्रीपाद नायक हांकां मेळपाचें निश्चीत जालां. दक्षीण गोंयांत भाजपाचो उमेदवार कोण आसतलो? हाचे विशीं कार्यकर्ते तशेंच लोकांमदीं उमळशीक आसा. आदले खासदार अॅड. नरेंद्र सावयकार, आदले उपमुख्यमंत्री चंद्रकांत कवळेंकार आनी आदले मुख्यमंत्री दिगंबर कामत हांच्या नांवांची उमेदवारी खातीर चर्चा आसा.
फाटले लोकसभा वेंचणुकेंत पक्षाक व्हड येस मेळिल्लें आसलें तरी भाजपाचे उमेदवार अॅड. नरेंद्र सावयकार हांकां हार घेवची पडिल्ली. हाका लागून दक्षीण गोंय जिखपा खातीर पक्षान हालचाली सुरू केल्यात, अशी म्हायती गोपांनी दिली.
लोकसभा वेंचणुके संबंदांत भारतीय जनता पक्षाची बुधवारा पणजे बसका जाली. हे बसकेक केंद्रीय मंत्री राजीव चंद्रशेखर हांणी मार्गदर्शन केलें. मगोचे फुडारी आनी मंत्री सुदिन ढवळीकार, अपक्ष आलेक्स रेजिनाल्ड, आंतोन वाझ बसकेक हाजीर आशिल्ले. लोकसभे खातीर आमदार, मंत्र्यां सयत घटक पक्षांच्या आमदारां वांगडा बसका जावपाची ही पयलीच खेप. बसकेंत उक्तेपणी उमेदवारांच्या नांवांचेर चर्चा जावंक ना. तरी लेगीत सगळ्या आमदारांक उदरगतीचे प्रकल्प तशेंच कल्याणकारी येवजणेंच्या कार्यवाहीचेर भर दिवपाची सुचोवणी केली.
अॅड. नरेंद्र सावयकार हे 2014 आनी 2019चे वेंचणुकेत पक्षाचे उमेदवार आशिल्ले. 2014 त तांकां जैत मेळ्ळें, मात 2019 त तांकां हार घेवची पडली. ते पक्षाच्या केडराचे कार्यकर्ते आशिल्ल्यान तांचें नांव सगळ्यांत फुडें आसा.
अॅड. नरेंद्र सावयकार हांचे उपरांत आदले मंत्री चंद्रकांत उर्फ बाबू कवळेंकार हांचें नांव चर्चेंत आसा. कवळेंकार हे अनुसूचीत जमातीचे फुडारी आसा. लोकसभा वेंचणुकेंत तांकां उमेदवारी दिल्यार बरें येस पक्षाक मेळटलें, असो पक्षाच्या अंतर्गत सर्व्हेक्षणाचो अदमास आसा. उमेदवारी दिली जाल्यार ती घेवपाची तयारी कवळेंकार हांणी दाखयल्याची म्हायती गोपांनी दिली.
आदले मुख्यमंत्री दिगंबर कामत हांच्याय नांवाची चर्चा आसा. काँग्रेसींतल्यान भाजपांत प्रवेश केल्लो तेन्ना दिगंबर कामत हांकां मंत्रीमंडळांत पेजाद खातें मेळटलें, अशी आस्त आशिल्ली. वर्स जावन गेले तरी तांकां कसलेंच पद मेळूंक ना. तांची नाराजी पयस करपा खातीर तांकां लोकसभा उमेदवारी दिवपाचो प्रस्ताव आसा. राज्यांत तांकां मंत्रीपद मेळूंक नासले तरी केंद्रांत मंत्रीपद दिवन भरपाय करपाचो हेत हाचे फाटल्यान आसा.
दक्षीण गोंय उमेदवारी खातीर ह्या तीन नांवां सयत दामोदर नायक हांच्या नांवाची चर्चा आसा. फातोड्डें मतदारसंघांत 2012 सावन सेगीत तांकां हार खावची पडल्या. लोकसभा उमेदवारी खातीर ते इत्सूक आशिल्ल्याचें कळटा.
दक्षीण गोंय उमेदवारीचो निर्णय पक्ष घेतलो. पक्ष घेता तो निर्णय मान्य करचो पडटा, अशें सगळया इत्सुकांनी उमेदवारी विशीं विचारल्या उपरांत सांगलें.
उमेदवार थारोपाचो अधिकार प्रदेश अध्यक्ष वा राज्य समितीक ना. आमी फकत उमेदवारांची शिफारस करता. शिफारशी उपरांत केंद्रीय वेंचणुक समिती आनी संसदीय मंडळ उमेदवारी विशी निर्णय घेता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
