भांगरभूंय | प्रतिनिधी
बार्देसांतल्या साळगांव, हळदोणें पंच वांगड्या कडेन सादलो संवाद
म्हापशें: देशाच्या संविधानांत लोक हेच सर्वोच्च आसात. राज्यपाल, मंत्री वा आमदार न्हय. पंच ते आमदार हांकां लोकप्रतिनिधींच्या रुपांत लोकूच वेंचून दितात. लोकप्रतिनिधी प्रमाणूच सरकारी नोकर हे लेगीत लोकांचे सेवक आसात. जनता हीच सर्वोच्च आसून लोकप्रतिनिधी आनी सरकारी कर्मचारी लोकांची सेवा करपाक बांदील आसात अशें राज्यपाल पीएस श्रीधरन पिल्लई हांणी केलें.
संपूर्ण गोवा दर्शन ह्या उपक्रमा खाला बुधवारा बार्देस म्हालांतल्या साळगांव आनी हळदोणें भोंवडे वेळार आयोजीत केल्ल्या पंच वांगड्यां कडेन संवाद कार्यावळींत राज्यपाल पिल्लई उलयताले.
सकाळीं तांणी साळगांव मतदारसंघाक आनी सांजवेळा हळदोणें मतदारसंघाक भेट दिली. साळगांवां पिळर्ण-मार्रा पंचायत सभाघरांत आनी हळदोण्यां सेंट थॉमस गर्ल्स हायस्कूल सभाघरांत आयोजीत कार्यावळींत ते उलयताले.
ह्या वेळार माचयेर साळगांवचे आमदार केदार नायक, हळदोणेंचे आमदार अॅड कार्लुस फेरेरा, राज्यपालांचे सचीव मिहीर वर्धन, अतिरिक्त जिल्होधिकारी संजीव देसाय, उपजिल्होधिकारी डॉ. स्नेहा गित्ते (आयएएस), गुरूदास देसाय, मामलेदार कृष्णा गांवस, गट विकास अधिकारी शिवप्रसाद नायक, तशेंच साळगांव आनी हळदोणें मतदारसंघाल्या पंचायतींचे सरपंच, उपसरपंच आनी पंच हाजीर आशिल्ले.
गोंयची भूंय ही देवाची भेट आसा. देशांतल्या कांय राजधानीं मदीं पर्यावरण तशेंच प्रदुशणाचो प्रस्न भेडसायत आसा. दिल्लींत वायू प्रदुशणाक लागून स्थिती बिकट जाल्या. देशांत ताज्या प्राणवायेचो उणाव भासता. पिळर्ण-मार्रा आनी हळदोणें वाठारांतले लोक हे भाग्यवान आसात. गांवच्या चारूय वटांनी पांचवो सैम आसून लोकांक ताजी हवा मेळटा.
देशाच्या विकासाक सद्या ग्रामस्वराजाची गरज आसा. ग्रामस्वराज होच देशाच्या विकासा खातीर पर्याय आसा. हो कानमंत्री महात्मा गांधी हांणी दिल्लो. राज्यपाल निधी खाला वर्सभरांत डायलिसीसच्या उण्यांत उणें 71 दुयेंतींक अर्थीक मजत करपाचो विचार आशिल्लो. पूण हो आंकडो आमी हुंपून 500 परस चड लाभार्थींक मजत पावली हाचें समाधान आसा. आमी राज्यपाल पंगडा कडल्यान 70 टक्के गोंयची भोंवडी पुराय केल्या. फुडल्या दोन म्हयन्यांत पुराय गोंय भोंवडी येसस्वी करूं अशें तांणी म्हणलें.
आमदार केदार नायक हांणी म्हणलें, साळगांव मतदारसंघांतल्या कांय वाठारांनी आयजूय वीज आनी उदकाची समस्या आसा. एक दीस सोडून घरांतल्या नळाक उदक येता. लोकांक दीसपट्टे चार वरां तरी उदक मेळूंकच जाय. सेगीत वीज पुरवण खंडीत जावपाची समस्या आसा. राज्यपाल आनी सरकारान ह्या मुळाव्या सुविधांचो प्रस्न चालीक लावपाक सहकार्य करचें अशें आवाहन तांणी केलें.
मजगतीं, साळगांव आनी हळदोणें मतदारसंघांतल्या पंचायतीच्या सरपंचांनी आपल्या वाठारांतल्यो कागाळी राज्यपालां मुखार मांडल्यो आनी मागण्यांचें निवेदन तांणी सादर केलें. ह्या वेळार राज्यपालांचे हस्तुकीं डायलिसीसच्या लाभार्थ्यांक अर्थीक मजतीचे धनादेश सुर्पूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
