भांगरभूंय | प्रतिनिधी
आदल्या काळार लग्न जावचे आदीं आवय धुवेक जायते सल्ले दिताली. कसो संवसार करचो, कशीं नातीं सांबाळचीं हे सगलें ती तिका समजायताली. चडशे खेप चलयां तें सगले आयकतालीं. जीं ह्या सांगणें भायर वतालीं, लोक तांकां नांवां दवरताले.
पयलीं सावन मनीस कुळाक बदल स्विकारपाक वेळ लागला. सट्ट करून कितेंय आपणावपाक केन्नाच मनशाक जमलें ना. बदल येता तेन्ना ताचो भंय दिसप, आदी सावन चलत आयलां, तें बंद कशें करप हो प्रस्न पडप हे सभावीक. पूण, बदल कित्याक लागून येता जांव कित्याक जावंक जाय हाचेर विचार करपी खूब कमी लोक आमकां मेळटात.
आयज नातीं कशीं सांबाळचीं हें सांगपाक आमकां नवीं माध्यमां मेळ्ळ्यांत. हालींच हांवें एक इंस्टाग्राम पोस्ट पळयलो जातूंत आदीं कशी आवय धुवेक समजायताली तशेंच समजावपी पोस्ट. कितें काय म्हणल्यार – लग्नाच्या पयल्या म्हयन्यांत एका घोवान आपले बायले खातीर कितें करूंक जाय तें सगले! वाचून हांसूंक आयलें. पयली म्हणल्यार लग्नाच्या पयल्याच म्हयन्याक कित्याक? आयुश्यभर कित्याक न्ही? दुसरी गजाल जी म्हाका खटकली ती म्हणल्यार, ह्यो सगल्यो गजाली घोवानूच कित्याक करच्यो? आतां तुमी म्हणटलीं- इतलीं वर्सां फकत बायलांकूच कितें करचें तें सांगलें – आतां मातशें घोवांकय आयकुंदी. विचार बरो आसा. पूण, अशा विचारांनी आमी परत एकदां लिंगा प्रमाण कृती वांटून घालपाची परंपरा मुखार व्हरनात मू?
हालींसराक लेगीत म्हाका एका चलयेन सांगलां – लग्ना खातीर हांवें म्हज्या घोवाक विचारिल्लें हें म्हज्या आवयक कळूंक दिनाका आं! कारण आयज लेगीत ‘चली आनी केन्ना प्रपोज करता’ अशे तरेचे विचार घोळटात आनी त्या विचारांक वयाची मर्यादा ना. कांय गजाली दादल्यांनीच करपाक जाय अशी अपेक्षा आसता. पूण कित्याक म्हणून? आयज जेन्ना लैंगीक समानताये वटेन वचपाचो यत्न चल्ला तेन्ना दादल्यांनीय कित्याक करच्यो परंपरेन चलत आयिल्ल्यो कृती?
जर खंयच्याय दादल्याक दिसता ताका घरा रावन घरचें काम करूंक जाय जाल्यार ताका नांवां दवरचे परस ताणें निवडिल्ल्या मार्गाचो आदर करूंक फावो. हालींच एक काणी आयकल्ली, ती म्हणल्यार नजर नासीर ह्या कश्मीरांतल्या तरनाट्याची – जो वीणकाम (क्रोशे) करता. परंपरेन वीणकाम फकत बायलांचें काम म्हणून पळयलां. तें तशें कित्याक हाचीं घडये जायतीं कारणांय आसत. तें काम करपाक नाजूक हात जाय, बायलांचें हात नाजूक आसतात अशें आनी जायतें. पूण जर खंयच्याय दादल्याक दिसता तो तें काम करूंक शकता आनी तो तें बरे तरेन करता जाल्यार हेरांक ताचो त्रास कित्याक जावंक जाय?
दुर्दैवान आमचो समाज इतलो बंदिस्त वागता की फास्के भायर वचप्यांक नांवां दवरले शिवाय जायना. अजून लेगीत, बायल घोवा परस चड जोडटा हें जायते जाणांक सोंसना आनी पचना. तशी गजाल व्हड न्ही, पूण ह्याच विचारांतल्यान आमची बदलाची एलर्जी दिश्टी पडटा.
घडये बदल सद्या सुरू आसा म्हणून आमकां त्रास जाता आसतले, पूण भिरांत अशी की हे विचार आमी फुडले पिळगे कडेन पावयतलीं आनी परत एकदां आज मेरेन चल्लां तेंच चलत रावतलें. आनी तेंय जातना आमकां दिश्टी पडटा. ल्हानशी गजाल पूण आयज लेगीत चल्याक गाडी दिवप आनी चलयेक बावली हें एक सामान्य चित्र जालां. जर खंयचोय चलो बावल्यांनी खेळटा जाल्यार “कितें चलया भशेन खेळटा” म्हण ताका हिणसायतात. हें घरांनीच न्हय तर शाळांनी लेगीत जाता. फुलां दिवपाची आसल्यार चलयो आनी बांक हालोवपाचें आसल्यार चले अशें सहजपणान आमी करून वतात, पूण तें करतना आमी अमकीं कामां चलयांचीं आनी अमकीं चल्यांची हेय धडे नकळत घालून दितात हे लक्षांत येता काय ना, हाचेर विचार करपाची गरज आसा.
ह्या सगल्यांत भर म्हणून भांडवलशायेन बुडिल्ली नव्या जगाचीं साधनांय लेगीत ह्याच विचारांक पालव दितना दिसतात. ताकाच लागून भुरग्यां खातीर येवपी चॉकलेटी लेगीत चल्यां खातीर वेगळ्यो आनी चलयां खातीर वेगळ्यो येतात. कपडे लेगीत चल्यां खातीर निळे आनी चलयां खातीर गुलाबी येतात. आनी म्हणूनच खंयची तरी ‘पेज’ आमकां सांगता घोवान बायले खातीर कितें कितें करचें तें. बायले खातीर रांदचें, तिका फुलां हाडचीं – फकत लग्नाच्या पयल्याच म्हयन्याक? घडये हे सगले मनार घेवपी लोक आसतूय आमचे मदीं. मागीर प्रस्न पडटा तो असो – आमचीं नातीं कशीं सांबाळचीं हें लेगीत आमी आतां ऑनलायन शिकतलीं? केन्ना केन्ना तर हे सल्ले अशे तरेन मुखार येतात की हेंच परम सत्य आशिल्ले भशेन. तें सोडून जर आनी दुसरे तरेन कोणय वागता जाल्यार तें विचित्र अशें कोणाकय दिसचें.
मागीर ताकाच लागून भकीक पडटा आयची पिळगी आनी वागता तेंच प्रमाण. चली मागणी घालना कारण आवयच न्हय तर खंयची तरी ऑनलायन ‘पेज’ ताका तशें सांगता. पूण सुदैवान कांय ‘पेजी’ अश्योय आसात ज्यो ह्यो फास्क्यो मोडपी काणयो सांगता. तेन्नाच घडये लिपून लिपून आपल्याक आवडटा तें ‘चलयांचें काम’ करपी एका खंयच्या तरी चल्याक मातशें धैर्य येता.
लैंगीक समानताय म्हणल्यार फकत बायलांक मेळपी हक्क न्हय तर
सगल्याच लिंगांच्या (दादलो, बायल वा तृतीयपंथी) मनशांक तांकां कितें आवडटा, मनाक भावता तें करपाचें स्वातंत्र आसप. स्वातंत्रच न्हय तर तो वा तें ती गजाल करता म्हणून हिणसावाणी येवची न्हय ताच्या वांट्याक. रंग, कृती, कामां सगलीं सगल्यांचीं जावचीं… कोणा एकल्याचीच न्हय!
डॉ. तन्वी बांबोळकार
9764780497
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.