भांगरभूंय | प्रतिनिधी
आमदार डिलायला लोबोः कृशी मंत्र्यान लक्ष घालपाची मागणी
भांगरभूंय । प्रतिनिधी
शिवोलीः लुवणी करपी मशिनाचें भाडें अंदूं वाडयलां. हें भाडें उणें करून शेतकारांक थाकाय दिवची, अशी मागणी शिवोलीची आमदार डिलायला लोबो हांणी केल्या.
आसगांवां मशिना वरवीं लुवणी करपाच्या कामाक सुरवात जाली. ह्या वेळार आमदार लोबो उलयताली.
लुवणी करपाक मशिनाचें भाडें वराक 2400 रुपया आशिल्लें. अंदूं तें वाडोवन 2800 रुपया केलां. ह्या वाडयिल्ल्या भाड्याचो मार शेतकारांक बसता. मुख्यमंत्री आनी कृशी मंत्र्यान हातूंत लक्ष घालचें, अशी मागणी लोबो हांणी केली.
लोकांनी शेतांत लक्ष घालचें. शेती होच आमचो फुडार. कोरोना म्हामारी काळांत जांच्या घरांत तांदूळ आशिल्ले तेच हुस्क्या मेकळे आशिल्ले. कोरोना म्हामारी काळांत भुरगीं मोबायलांतूच गुल्ल आशिल्लीं. तांकां शेतांत घेवन वचपाची गरज आसा, जे वरवीं शेतां कसपाक मजत मेळटली. शेतां पडीक दवरचीं न्हय, असो उलो आमदार लोबो हांणी ह्या वेळार मारलो. ह्या वेळार सरपंच हनुमंत नायक, उपसरपंच सोनिया श्रीसागर नायक, आदले पंच श्रीसागर नायक, कार्तीक कुडणेंकार, आदली उपसरपंच रिया नायक आनी हेर मानेस्त हाजीर आशिल्ले.
बोवाळ मारपी अंदूं खंय गेले?: नायक
पोरूं मशिना वरवीं लुवणी करपाक सुरवात करपा वेळार बोवाळ मारपी अंदूं खंय गेले? पोरूं मायकल लोबो हांणी शेतकारां खातीर लुवणी करपाचें मशीन हाडिल्लें. त्या वेळार एका आदल्या मंत्र्यान बोवाळ मारिल्लो. पुलिसांक लेगीत आपोवचे पडिल्लें. आदल्या मंत्र्यान फक्त मतां खातीर राजकारण केल्लें. अंदूं आदल्या मंत्र्यान फुडाकार कित्याक घेवंक ना, असो प्रस्न आसगांवचे सरपंच हनुमंत नायक हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
