भांगरभूंय | प्रतिनिधी
आरोपीन लग्नाचें हांयस दाखोवन बायलेची केल्ली फटवणूक
पणजी: लग्नाचें हांयस दाखोवन 40 वर्सां पिरायेचे बायलेचेर लिंगीक अत्याचार केल्ल्या प्रकरणांत बेतीं हांगासरल्या आसीफ खान उर्फ ख्वाजा ह्या लग्न जाल्ल्या दादल्याक उत्तर गोंय जिल्हो आनी सत्र न्यायालयान 10 वर्सांची कश्टाची बंदखण आनी 1.20 लाख रुपया दंड आनी हेर ख्यास्त फर्मायली. हो आदेश न्या. शबनम शेख हांणी बुधवारा जारी केलो.
ह्या प्रकरणांत पिडीत बायलेन पोरणें गोंय पुलीस स्टेशनार कागाळ दाखल केल्ली. ते प्रमाण, आरोपीन लग्न जाल्लो आसतना तिची फटवणूक करून पिडीत बायलेक लग्नाचें हांयस दाखोवन मे 2009 ते ऑगस्ट 2014 मजगतीं खूबशे फावटी वेगळ्यावेगळ्या सुवातींनी व्हरून तिचेर लिंगीक अत्याचार केल्ल्याचें कागाळींत म्हणिल्लें. तशेंच खूबशे फावटी वेगळींवेगळीं कारणां सांगून तिचे कडल्यान 1.55 लाख रुपया घेतिल्ल्याचें कागाळींत म्हणिल्लें.
हाची दखल घेवन पोरणें गोंय पुलीस स्टेशनाचे तेन्नाचे निरिक्षक कृष्णा सिनारी हांच्या मार्गदर्शना खाला तेन्नाचे पुलीस उपनिरिक्षक सगुण सावंत हांणी 30 सप्टेंबर 2014 दिसा आरोपी आड भारतीय दंड संहितेच्या कलम 376 (लिंगीक अत्याचार), 406 (फटवणूक) आनी 323 (मारपेट) खाला गुन्यांव दाखल करून अटक केल्ली. ह्या प्रकरणांत पुलिसांनी आरोपी आड संबंदीत सुवातीच्या साक्षिदारांची जबानी नोंद करून तशेंच हेर कडले म्हत्वाचे पुरावे एकठांय केल्ले. तशेंच ह्या प्रकरणांत न्यायालया मुखार पिडीत चलयेची जबानी नोंद केल्ली.
मजगतीं, आरोपीन पणजेंतल्या पयलो वर्ग न्यायालयांत जामिना खातीर अर्ज दाखल केल्लो. हो जामीन अर्ज भायरायले उपरांत पणजेंतल्या उत्तर गोंय जिल्हो आनी सत्र न्यायालयान आरोपीक 17 ऑक्टोबर 2014 दिसा सशर्त जामीन मंजूर केल्लो. उपरांत पुलिसांनी आरोपी आड 29 ऑक्टोबर 2015 दिसा पणजेंतल्या पयलो वर्ग न्यायालयांत आरोपपत्र दाखल केल्लें.
लिंगीक अत्याचार प्रकरण सत्र न्यायालयाच्या अधिकार क्षेत्रांत येत आशिल्ल्यान थंय वर्ग केलें. ह्या प्रकरणांत सरकारी वकील नीता मराठे हांणी स साक्षिदारांची उरफाटी तपासणी करून आरोपीन केल्लो गुन्यांव गंभीर आसून ताणें पिडीत बायलेक लग्नाचें हांयस दाखोवन तिचेर लिंगीक अत्याचार केला आनी तिची फटवणूक केल्ल्याचो दावो करून ताका दोशी थारावन खर ख्यास्त दिवपाचो युक्तीवाद केलो.
उपरांत ह्या प्रकरणांत सुनावणी पूर्ण करून उत्तर गोंय जिल्हो आनी सत्र न्यायालयाचे न्यायाधीश शबनम शेख हांणी सोमारा 17वेर आरोपी आसीफ खान उर्फ ख्वाजा ह्या आरोपीक दोशी थारयलें. पिडीत बायलेचेर लिंगीक अत्याचार केल्ल्या प्रकरणांत आरोपीक 10 वर्सांची कश्टाची बंदखण आनी 1 लाख रुपयाची ख्यास्त दिली. जाल्यार दंड भरलो ना जाल्यार दोन म्हयन्याची सादे बंदखणीची ख्यास्त दिली.
जाल्यार फटवणूक केल्ल्या प्रकरणांत आरोपीक 1 वर्साची सादी बंदखण आनी 10 हजार रुपयाची ख्यास्त दिली. जाल्यार दंड भरलो ना जाल्यार एका म्हयन्याची सादी बंदखणीची ख्यास्त दिली. मारपेट केल्ल्या प्रकरणांत स म्हयन्याची सादी बंदखण आनी 10 हजार रुपयाची ख्यास्त दिली. दंड भरलो ना जाल्यार एका म्हयन्याची सादे बंदखणीची ख्यास्त दिली. हाचे बगर ह्यो सगल्यो ख्यास्ती एकाच वेळार भोगच्यो पडटल्यो. तशेंच दंडाची रक्कम जमा केल्यार पिडीत चलयेक दिवपाचो निर्देश न्यायालयान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
