लाला अमरनाथ हांचो बायोपीक येतलो

भांगरभूंय | प्रतिनिधी

खबरां संस्था
मुंबयः  भारताचे  आदले क्रिकेटीयर मोहम्मद अझरुद्दीन, एएमएस धोनी,  मिताली राज, कपील देव आनी प्रवीण तांबे हांच्या उपरांत आनी एका क्रिकेटीयराचो बायोपीक रोखडोच पड्ड्यांचेर पळोवपाक मेळटलो. लाला अमरनाथ अशें ह्या म्हान खेळगड्याचें नांव आसा. दिग्दर्शक राजकुमार हिराणी लाला अमरनाथ हांचेर बायोपीक तयार करतलो.
हो बायोपीक करपाची खूब दिसां सावन इत्सा आशिल्ली मात शाहरूख खानान डंकीची निवड केल्ल्या ताका कळाव जालो. मीडिया रिपोर्टा प्रमाण हो बायोपीक अदूं वर्सा डिसेंबरांत रिलीज जातलो. ताची निर्मणी फरहान अख्तराची कंपनी एक्सेल एंटरटेनमेंट करतली. राजकुमार हिरानी हाणे संजूं, थ्री इडियट्स, पीके, मुन्नाभाई एमबीबीएस सारके सिनेमा तयार केल्यात.
हिरानीन 2019 वर्सा ह्या बायोपिकाची येवजण तयार केल्ली. मात कांय कारणांक लागून तो करपाचें लांबणेर पडत गेले. आता मात तांणी ताचेर काम सुरू केलां. म्हान क्रिकेटीयर लाला अमरनाथ हाचो जल्म 11 सप्टेंबर 1911 दिसा पंजाबांतल्या कपूरथळा हांगा जालो. ताचें नांव नानिक अमरनाथ भारद्वाज आशिल्लें. ते उत्तर प्रदेश, दक्षीण पंजाब, रेल्वे, गुजरात ह्या पंगडां खातीर देशांतर्गत क्रिकेट खेळ्ळे. 15 डिसेंबर 1933 दिसा तांणी आंतरराष्ट्रीय क्रिकेटींत पावल घातलें. 12 डिसेंबर 1952दिसा ते निमणी टेस्ट मॅच खेळ्ळे. पिरायेच्या 88व्या वर्सा 5 ऑगस्ट 20000 दिसा तांकां मरण आयलें.
1933 तें 1952 मजगतीं अमरनाथ 24 टॅस्ट मॅची खेळ्ळे. तांच्या नांवार एक शेंकडो आनी चार अर्द शेंकडे आसात. तांणी 45 विकेटी घेतल्ल्यात. मोहिंदर अमरनाथ आनी सुरिंदर अमरनाथ हाचे ते बापूय