भांगरभूंय | प्रतिनिधी
8 आनी 9 जानेवारीक भौशिक सुनावणी
पणजी : नव्या वर्सांत राज्याचें घरगुती तशेच उद्येगीक वीज बिल वाडपाची शक्यता आसा. वीज दरवाडीचो प्रस्ताव वीज खात्यान जोड वीज नियमन आयोगा कडेन (जेईआरसी) दवरला. ह्या प्रस्तावाचेर 8 आनी 9 जानेवारीक भौशिक सुनावणी जातली. जोड वीज नियमन आयोगान मान्यताय दिले उपरांत वीज बिलांचे दर वाडटले. वीज दर वाडीक मान्यताय मेळ्ळी जाल्यार ती 1 एप्रिल 2024 सावन लागू जातली.
सध्या पयल्या 100 युनिटां मेरेन विजेचो दर 1.75 रूपया प्रती किलो वॅट आवर आसा तो 1.88 रूपया प्रती किलो वॅट आवर करपाचो प्रस्ताव आसा. 101 ते 200 युनिटा मेरेन 2.6 रूपया प्रती किलो वॅट आवर वेल्यान 2.79 रूपया करपाचो प्रस्ताव आसा. उद्येगिक, शेती, वेवसायिक विजेचे दर सुद्दा वाडोपाचो प्रस्ताव आसा.
वीज दर वाडीच्या प्रस्तावाचेर वीज खात्यान सुचोवण्यो मागयल्या. सुचोवण्यो 5 जानेवारी 2024 मेरेन सादर करप बंधनकारक आसा. उत्तर गोंयां खातीर 8 जानेवारी 2024 रोजी पणजे मिनेझिस ब्रागांझा सभाघरात भौशिक सुनावणी जातली. दक्षिण गोंयां खातीर 9 जानेवारी 2024 रोजी मडगाव माथानी साल्ढाणा संकुलात भौशिक सुनावणी जातली. हे विशीची भौशिक सुचोवणी जारी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
