भांगरभूंय | प्रतिनिधी
भांगरभूंय । खबरां मेज
पणजीः गोंय सरकारान लाडली लक्ष्मी येवजण चलयांक फकत लग्ना खातीरूच अर्थीक मजत करपा इतली मर्यादीत दवोरनास्ताना तांकां उच्च शिक्षण घेवपाक, वेपार वा वेवसाय सुरू करपा खातीर लागू करची अशी मागणी बायलांचो सादान केल्या. लाडली लक्ष्मी येवजण फकत लग्ना खातीरुय लागू करपाच्या गोंय सरकाराच्या निर्णयाक सादान आक्षेप घेतला.
लाडली लक्ष्मी येवजणेच्या माध्यमांतल्यान सरकारान चलयांचें सबलीकरण करपाची मोख दवोरपाक जाय ते खातीर उच्च शिक्षण, वेपार- वेवसाय आनी हेर गजाली खातीर चलयांक अर्थीक मजत करपाक जाय. फकत लग्न करपा खातीरुच हे येवजणेतल्यान मजत करपाच्या सरकारी निर्णयाक लागून एक लाख रुपये मेळोवपा खातीर चलयांक बेगीन लग्न करून दिवपाचे प्रकार वाडपाची भिरांत बायलांचो सादाच्या सबिना मार्टिन्स हिणे उक्तायल्या.
लाडली लक्ष्मी येवजणे खाला चलयांक उच्च शिक्षण घेवपाक, कुशळताय वाडोवपाक, वेपार-वेवसाय करपा खातीर अर्थीक मजत केल्यार त्यो लाखानी रुपया जोडपाक शकतल्यो. लाडली लक्ष्मी येवजणेच्या पयशां खातीर तांकां बेगीन लग्न करून दिवपाचे प्रकार सुरू जाल्यार तांचे पुराय करिअर काबार जावपाची शक्यताय मार्टिन्स हिणे उक्तायल्या.
जायत्या चलल्यांक उच्च शिक्षणाचो आनी येरादारीचो खर्च परवडना ते खातीर त्या शिक्षण घेवपाक फाटीं रावतात. कोविडा उपरांत अर्थीक परिस्थिती बदल्ल्या. दरेका मळार सध्या सर्त चल्ल्या. ताका लागून चलयांची कुशळताय वाडोवन तांकां सर्तीक तोंड दिवपाक तयार करपाची गरज आसा. अश्या वेळार लाडली लक्ष्मी येवजणेतल्यान सरकारान तांकां अर्थीक मजतीचो हात दिवपाक जाय अशें मार्टिन्स हिणे एके प्रसिद्धी पत्रकांत म्हणलां.
लग्न जावचे पयलीं चलयांक आपली अर्थीक उन्नती करून घेवपा खातीर जाय तें शिक्षण घेवपाक मेळपाक जाय. लाडली लक्ष्मी येवजणेचे पयसे तिका जाय ते खातीर वारपाची मेकळीक तिका मेळपाक जाय. सध्या लाडली लक्ष्मी पयशां वयल्यान लग्न जाल्ले चलयेच्या कुळारा आनी घोवा कडल्यान घरांत झगडी जाल्लीं दिश्टी पडटात हें मार्टिन्स हिणे सरकाराचे नदरेक हाडून दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
