भांगरभूंय | प्रतिनिधी
इंडियन प्रिमीयर लिगेंतले (आयपीएल) सामके उमळशीक वाडोवपी मॅचींत लखनौ सुपर जायण्ट्सान येजमान रॉयल चॅलेंजर्स बंगळुरूक एके विकेटीन हारयलो.
रॉयल चॅलेंजर्स बंगळुरून 213 धांवड्यांची मोख लखनौन निर्धारीत 20 ओव्हरींनी 9 विकेटी वगडावन मेळयली.
मोखीचो फाटलाव करपी लखनौची सुरवात बरी जावंक नाशिल्ली. ताणें एक धांवडेचेर पयली विकेट वगडायिल्ली, जाल्यार 99चेर ताचे चार बॅट्समन तंबूंत गेल्ले. ताका लागून लखनौ खातीर ही मॅच जिखप कठीण दिसतालें. पूण, निकोलस पुरनान आक्रमक बॅटींग करून रॉयल चॅलेंजर्स बंगळुरूचें सगलेंच समिकरण बदल्लें. ताणें पयल्या बॉला सावन बंगळुरूच्या बॉलरांची बॉलींग फोडून काडपाक सुरवात केली. ताचे बॅटिगेंक लागून लखनौ सामको जैताच्या लागसार पावलो. ताका आयुष बदोनीन लेगीत बरी साथ दिली. ताणें 30 धांवड्यांची खेळी केली. पूण, पुरन बाद जाल्या उपरांत लखनौ परतून संकश्टांत सांपडलो. ताच्या फाटोफाट आयुष हिट विकेट जालो. मार्क वुड आनी जयदेव लेगीत तंबूंत परतलो. पूण, रवी बिश्नोईन निमाण्या बॉलाचेर एक धांवडी काडून आपल्या पंगडाक जैत मेळोवन दिलें.
लखनौचो विकेटकीपर बॅट्समन निकोलस पुरनान फकत 15 बॉलांनी अंदूंच्या हंगामांतलो जलद अर्द शेंकडो पुर्ण केलो. ताचे पयलीं मार्कस स्टोयनीसान 30 बॉलांनी 65 धांवड्यांची आक्रमक बॅटींग केल्ली.
ते पयलीं लखनौ सुपर जायण्ट्सान टॉस जिखून रॉयल चॅलेंजर्स बंगळुरूक पयलीं बॅटींग करपाचें आमंत्रण दिलें. मुखेली फाफ ड्युप्लेसीस आनी विराट कोहली हांणी पंगडाक बरी सुरवात करून दिली.
फाफ ड्युप्लेसीसान मॅचींत दुसरी धांवडी घेना फुडें आयपीएलांत 3500चो पांवडो हुपलो.
कोहलीन लेगीत बरी बॅटींग केली. दोगांयनी मेळून रॉयल चॅलेंजर्स बंगळुरूक 5.3 ओव्हरींनी 50 धांवड्यांचो टप्पो हुपून दिलो. हातूंत कोहलीच्यो 40 धांवड्यो आशिल्ल्यो. कोहली काल वेगळ्याच फॉर्मांत आशिल्लो. रवी बिश्नोईचो दावे वटेन वचपी बॉलाचेर शॉर्ट मारपाक चुकल्या उपरांत कोहली सामको बेजार जालो. बिश्नोईन बंगळुरूच्या स्टार बॅट्समनांक नाकापुरो केल्लें. स्पिनर आयल्या उपरांत कोहलीचो खेळ मात्सो सावकाश जालो आनी ताका अर्द शेंकडो पुर्ण करपाक 35 बॉल लागले.
कृणाल पांड्याच्या बॉलाचेर जबरदस्त चवको मारलो. बंगळुरून 10 ओव्हरींनी बिनबाद 87 धांवड्यो केल्यो. कोहलीन आयपीएलांत अजून मेरेन 46 अर्द शेंकडे आनी पांच शेंकडे मारल्यात.आयपीएलांत सध्या खेळपी सगल्या पंगडां आड अर्द शेंकडो मारपी कोहली हो ऋतुराज गायकवाडा उपरांत दुसरो बॅट्समन थारलो.
काल तो आपलो सवो शेंकडो पुर्ण करतलो अशें दिशिल्लें. पूण, 41 वर्सां पिरायेच्या अमित मिश्रान ताका बाद केलो. कोहलीन 44 बॉलांनी चार चवके आनी चार सक्यांचे मजतीन 61 धांवड्यो केल्यो.
कोहली उपरांत ड्युप्लेसीस आनी ग्लॅन मॅक्सवेल हांणी लेगीत आक्रमक बॅटींग केली. बंगळुरून 15 ओव्हरींनी 1 विकेट वगडावन 137 धांवड्यो केल्ल्यो. स्पिनरांक मार पडल्या उपरांत मुखेल लोकेश राहुलान परतून मार्क वुडाक बॉलिंगेक हाडलो. ड्युप्लेसिसान ताका लेगीत सको मारून 35 बॉलांनी आयपीएलांतलो 27वो अर्द शेंकडो पुर्ण केलो. ड्युप्लेसीस आनी मॅक्सवेल हांणी दुसरे विकेटी खातीर 27 बॉलांनी 50 धांवड्यांची भागिदारी करून बंगळुरूची गाडी परतून रुळाचेर हाडली.
मॅक्सवेलान 24 बॉलांनी अर्द शेंकडो पुर्ण केलो. 19वे ओव्हरींत आवेश खानाक सेगीत दोन सके मारून ताणें आपलो अर्द शेंकडो पुर्ण केलो. ड्युप्लेसीस आनी मॅक्सवेल हांणी 43 बॉलांनी शेंकड्याची भागिदारी केली. मार्क वुडाचे अखेरचे ओव्हरींत बंगळुरुन फकत णव धांवड्यो केल्यो. ड्युप्लेसीसान 46 बॉलांनी पांच चवके आनी पांच सक्यांचे मजतीन नाबाद 79 धांवड्यो केल्यो. मॅक्सवेलान 29 बॉलांनी तीन चवके आनी स सक्यांचे मजतीन 59 धांवड्यो केल्यो. बंगळुरून 2 बाद 212 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
