भांगरभूंय | प्रतिनिधी
नरकासूर प्रतिमांचें प्रमाण आनीक वाडलें
पणजी : दिवाळी म्हणल्यार रशणायेची परब. चवथी उपरांत गोंयांत दिवाळेची उमेद चड आसता. नरकासूरांच्या प्रतिमांचें दहन करून गोंयकारांनी रशणायेचे हे परबेक येवकार दिलो. राज्यपाल पीएस श्रीधरन पिल्लई, मुख्यमंत्री डॉ. प्रमोद सावंत, राजकी पक्ष तशेच हेर फुडाऱ्यांनी गोंयकारांक दिवाळेचीं परबीं दिल्या.
फांतोडेर उठून तरणाट्यांनी नरकासूराचे प्रतिमेचें दहन केलें. उपरांत खळ्यान पणत्यो पेटोवन खोशी उक्तायली. दिवाळेक लागून घरा मुखार आकाशदिवे दिश्टी पडटात. तरेकवार तशेंच सोबीत आकाशकदिवे लोकांनी लायल्यात. दिवाळेची परब पांच दीस आसता. सकाळीं दिवळी जातकूच सांजे लक्ष्मीपुजनाची धूम आसतली. दुकानां तशेंच आस्थापनांनी लक्ष्मीचें पुजन जाता. दिवाळे उपरांत पाडवो, भावबीज ह्यो परबो येतात. हिंदू भाव पांच दीस खळ्यान पणत्यो लावपा सयत घरांचेर रोशणाय करतात. दिवाळेंत फराळ खावपाची पद्दत आसता. घरगुती तशेंच विकतो फराळ खावपाक शेजाऱ्यांक आपोवपाची प्रथा आसा.
हालींच्या वर्सांनी नरकासूराचें प्रस्थ वाडत आसा. अंदूं लेगीत शारां सयत गांवांनी रस्त्या कुशीक नरकासूराच्यो प्रतिमा दिसताल्यो. आयतारा रातभर नरकासूराक लागून संगीत तशेंच वाजप सुरू आशिल्लें. हाका लागून लोकांक त्रास जालो. लोकांनी नरकासूराच्यो प्रतिमा करच्यो न्हय. शारां सयत गांवांनी आकाशदिवो तशेंच हेर सर्तींचें आयोजन केल्लें.
इकोफ्रेंडली आकाशदिवे करचे
लोकांनी इकोफ्रेंडली आकाशदिवे करचे, तशेंच चायनीज आकाशदिवे विकते घेवचे परस थळाव्यांनी तयार केल्ले आकाशदिवे घेवचे. थळाव्या विक्रेत्यांक हातूंतल्यान उर्बा मेळटली अशें अशें मुख्यमंत्री डॉ. प्रमोद सावंत हांणी म्हणलां.
नरकासूराची प्रतिमा करप हें नरकासूराचे उदात्तीकरण जाता अशें वीज मंत्री सुदीन ढवळीकार हांणी सांगिल्लें. नरकासूरां खातीर राजकारण्यांनी देणग्यो दिवच्यो न्हय अशें आवाहन तांणी केल्लें. तांच्या ह्या आवाहनाक अंदूं तरी प्रतिसाद मेळूंक ना. सगल्या शारांनी तशेंच गांवांनी नरकासूराच्या प्रतिमांचे दहन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
