भांगरभूंय | प्रतिनिधी
500 परस चड जाणांक नेमणूक पत्रां, 20 हजारां वयर नोंदणी
भांगरभूंय I प्रतिनिधी
पणजी : गोंय सरकाराच्या मेगा जॉब मेळाव्यांत नोंदणी जाल्ल्या इत्सूक तरणाट्यांच्या आंकडेवारीचो विचार केलो जाल्यार नोंदणी केल्ल्या 48 टक्के विद्यार्थी वा तरणाट्यांक नोकऱ्यो मेळिल्ल्याचे दिसून येता. हाका लागून गोंय सरकाराचो मेगा जॉब मेळावो 48 टक्के येसस्वी जाला, अशें म्हणपाक हरकत ना.
ताळगांवच्या डॉ. श्यामाप्रसाद मुखर्जी स्टेडियमाचेर मंगळार आनी बुधवार अशें दोन दीस मेगा जॉब मेळावो जालो. इतल्या व्हड प्रमाणांत रोजगार मेळावो जावपाची ही पयलीच खेप. मेगा जॉब मेळाव्यांत 20 हजारां वयर इत्सूक तरणाट्यांनी नोंदणी केल्ली. हातूंतल्या 10 हजारां वयर इत्सूकांनी हजेरी लायली. हातूंतल्या 4,800 जाणांची नोकरे खातीर निवड जाल्या. 500 परस चड जाणांक नेमणूक पत्रां दिल्यांत. जांची नोकरे खातीर निवड जाल्या, पूण नेमणुकेचीं पत्रां मेळूंक नात, तांचे कडेन कंपनी संपर्क करतली, अशी म्हायती कामगार आयुक्त राजू गांवस हांणी दिली. ही आंकडेवारी अदमासाचेर आदारीत आसा. नेमकी आंकडेवारी अजून तयार जावपाची आसा, अशें तांणी सांगलें.
पयल्या दिसा मंगळारा 4,658 जाणांनी हजेरी लायिल्ली. हातूंतल्या 3,235 जाणांची नोकरे खातीर निवड जाली. 273 जाणांक नोकरेचीं नेमणूक पत्रां दिली.
हॉस्पिटॅलिटी, आयटीक प्राधान्य
मेगा जॉब मेळाव्यांत 160 कंपनींचो आस्पाव आशिल्लो. हॉस्पिटॅलिटी आनी म्हायती तंत्रज्ञान (आयटी) उद्देगांक तरणाट्यांनी चड प्राधान्य दिलां. नोकरेच्याे चड ऑफर्स हॉस्पिटॅलिटी आनी आयटी कंपनींनी दिल्यात. ते भायर फार्मा, एविएशन, क्रूज लायनर कंपनींनी लेगीत नोकरेच्यो ऑफरी दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
