भांगरभूंय | प्रतिनिधी
आयटीआय प्रशिक्षणाचें बदलते स्वरूप थारता फायद्याचें
भांगरभूंय I नारायण गांवस
पणजी : उद्देगीक प्रशिक्षण आनी कुशळटाय विकास खात्या वरवीं सुरू आशिल्ल्या राज्यांतल्या आयटीआयंत यत्ता धावेंत विशेश श्रेणींत पास जाल्ले विद्यार्थी प्रवेश घेतात. हाचे पयलीं आयटीआयंत 10वी नापास जाल्ल्या 969 जाणांनी अर्ज केल्यात. हातूंत 434 विद्यार्थी 60 टक्के परस चड गूण मेळोवन पास जाल्यात. म्हत्वाचें म्हणल्यार वट्ट 31 विद्यार्थी 75 टक्के परस चड गूण मेळयिल्ले आसात.
लोकांचो आतां आयटीआय कडेन पळोवपाचो दिश्टीकोण बदलता. विद्यार्थ्यांचो बदलतो विचार कांय वर्सां पयलीं 10वेंत चड गूण मेळयिल्ले विद्यार्थी विज्ञान फांट्यांत प्रवेश मेळोवपाक धडपडटाले. पूण आतां हो दिश्टीकोण बदल्ला. जायते विद्यार्थी उच्च माध्यमीक विद्यालयांनी शिक्षण घेनासतना आयटीआयंत प्रवेश घेतात. सध्या आयटीआयंत विवीध कुशळटायेचें अभ्यासक्रम आसात. अंदूं 42 नव्या अभ्यासक्रमांचो आस्पाव केला. ताका लागून जायते विद्यार्थी आयटीआयंत प्रशिक्षण घेवन रोजगार मेळयतात.
रोजगारांची संद आयटीआय केल्ल्या विद्यार्थ्यांक बेगीन उपलब्ध जाता. सध्या पदवी, पदव्युत्तर तशेंच अभियांत्रिकी, एलएलबी अशें जायते कोर्स केल्ले विद्यार्थी बेरोजगार आसात. पूण आयटीआय केल्ले विद्यार्थी कंपनींनी वा स्वताचो वेवसाय उबो करून रोजगार मेळयतात.
कॉलेज वा उच्च शिक्षणाच्या भानगडींत पडनासतना जायते विद्यार्थी आयटीआयक प्राधान्य दितना दिसतात. राज्यांतल्यो जायत्यो कंपनी आयटीआयंत प्रशिक्षण घेतिल्ल्यांक नोकऱ्यो दितात. आयटीआयचे बदलते स्वरूप हाका कारण आसा. पयलीं आयटीआयंत इलेक्ट्रीशियन, प्लंबरींग अशें कांय मेजकेच कोर्स आशिल्ले. पूण आतां वट्ट 42 कोर्स उपलब्ध आसात. तशेंच नवे कोर्स तयार जायत आसात. हातूंत ड्रोन टेक्नीशियन, ई-व्हेहिकल मॅकानीक अशा अभ्यासक्रमांचो आस्पाव आसा. आधुनीक प्रशिक्षण पुराय केले उपरांत विद्यार्थ्यांक रोखडीच नोकऱ्यांची संद मेळटा. विद्यार्थी ज्या कोर्सांक मार्केटांत मागणी आसा अशा कोर्सांचे प्रशिक्षण घेवपाक प्राधान्य दितात.
राज्यांत प्लबंरींग, एसी मॅकानीक अशें जायते कोर्स आयटीआयंत आसा. हातूंत प्रशिक्षण घेवन जायत्या जाणांनी स्वताचो वेवसाय सुरू केला. जाल्यार कांय जाण कंपनींनी नोकरेक लागल्यात.
आयटीआयचे बदलते स्वरूप
आयटीआयचे स्वरूप बदलत आसा. ताका लागून जायते विद्यार्थी आयटीआय प्रशिक्षणाचो लाव घेतात. हाचे पयलीं फक्त 10 वी नापास जाल्ले विद्यार्थीच आयटीआयंत प्रवेश घेताले. आतां 10वी, 12वेचे परिक्षेंत बऱ्या गुणांनी पास जाल्ले विद्यार्थी आयटीआयंत प्रवेश घेतात. आयटीआय कडेन विद्यार्थ्यांनी प्राधान्य दितात. सध्या उच्च शिक्षणाची पदवी घेतिल्ले विद्यार्थी बेरोजगार आसात. तांकां म्हयन्यांत 10 हजार पगाराचेर काम करचे पडटा. पूण आयटीआयंत प्रशिक्षण घेतिल्ले स्वताचो वेवसाय वा जायत्या कंपनींनी नोकरेक लागल्यात, अशे उद्देगीक प्रशिक्षण आनी कुशळटाय खात्याचे संचालक दीपक देसाय हांणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
