भांगरभूंय | प्रतिनिधी
मडगांव, प्रतिनिधी ः मडगांव रेल्वे स्टेशनाच्या संडासांत एके गुरवार बायलेन भुरग्याक जल्म दिलो. ही घडणूक उजवाडाक आयले उपरांत एनजीओच्या आदारान रेल्वे पुलीस आनी रेल्वे सुरक्षा दळ पुलिसांनी ते बायलेक आनी भुरग्याक उपचारा खातीर हॉस्पिटलांत दाखल केलें.
बिरेस्तारा सकाळीं भुरग्याचो रडपाचो आवाज आयले उपरांत ही घडणूक उजवाडाक आयली. ह्या वेळार रेल्वे पुलीस आनी रेल्वे सुरक्षा दळ पुलिसांनी चाइल्ड लायन संस्थेच्या कर्मचाऱ्यांक म्हायती दिली. सुरवेक सगळ्यांक दिसतालें, कोणे तरी प्रवासी भुरग्यांक सोडून गेलो. पूण सीसीटीव्ही फुटेज तपासले उपरांत ही बायल अजूनय रेल्वे स्टेशनाचेर आशिल्ल्याचें कळ्ळें. ते उपरांत एनजीओच्या आदारान उल्लेख केल्ल्या बायलेची चवकशी केली तेन्ना तिणें सांगलें, आपणाक आतांच भुरगे जालां आनी तें संडासांत आसा. आपणाक अशक्तपणा आयलो आनी घुंवळ आयली म्हणून हांव भायर येवन बाकाचेर बसली अशें तिणें सांगले. ते उपरांत पुलिसांनी एम्ब्युलन्स आपयली आनी भुरग्या सयत बायलेक दक्षीण गोंय जिल्हो हॉस्पिटलांत दाखल केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
