भांगरभूंय | प्रतिनिधी
खासगी जमीन संपादना खातीर तत्वता मान्यताय
अधिकारी पावंड्या वयले बसकेंत प्रकल्पाचेर चर्चा
भांगरभूय । प्रतिनिधी
पणजी: हॉस्पेट- तिनईघाट- वास्को रेल्वेमार्ग दोट्टीकरण प्रकल्प पुराय करपा खातीर 31 डिसेंबर 2026 ही सुदारीत डेडलायन आसा. ह्या प्रकल्पा खातीर खासगी जमीन संपादीत करपाक तत्वता गोंय सरकारान मान्यताय दिल्या. दक्षीण गोंय जिल्होधिकाऱ्यांनी जमीन संपादनाची प्रक्रिया पुराय करची, अशी शिफारस केंद्रीय पावंड्या वयल्या अधिकाऱ्यांचे बसके उपरांत केल्या.
गोंयच्या प्रलंबीत प्रकल्पांचेर दिल्लींत अधिकारी गटाची बसका जाली. हे बसकेक गोंयचे मुखेल सचीव व्हीडीयो कॉन्फरंसींग माध्यमांतल्यान वांटेकार जाले. रेल्वे दोट्टीकरणा सयत गोंयच्या हेर प्रकल्पांचेर बसकेंत चर्चा जाली, अशी म्हायती गोपांनी दिली.
गोंयांत ह्या प्रकल्पाक खूब जाणांचो विरोध आसा. हो प्रकल्प रद्द जावपाची मागणी आसली तरी प्रकल्प फुडें व्हरपाच्यो रेल्वे मंत्रालयाच्यो हालचाली सुरू आसात. हाचे खातीरचे सोपस्कार लेगीत सुरू आसात.
प्रकल्पाचें काम 86 टक्के पुराय
रेल्वे दोट्टीकरण प्रकल्पाचें काम 86 टक्के पुराय जालां. गोंय आनी कर्नाटकांत जावपी ह्या प्रकल्पाचें काम जमीन संपादनाक लागून उरलां. ह्या प्रकल्पाचेर 3,692 कोटी रुपया खर्च जावपाचो मुळावो अदमास आसा. प्रकल्पाचें काम 26 जुलय 2012 ह्या दिसा सुरू जाल्लें. प्रकल्प पुराय जावपाची आदली तारीख 27 जुलय 2016 आशिल्ली. जमीन संपादनाक उशीर जाल्ल्यान हे तारखे भितर प्रकल्प पुराय जालो ना. आतां 31 डिसेंबर 2026 ही प्रकल्प पुराय करपाची नवी डेडलायन आसा.
दक्षीण गोंयांत 6 हेक्टर जमीन संपादनाची प्रक्रिया प्रलंबित
दक्षीण गोंयांत 12.15 हेक्टर जमनींतली 6.017 हेक्टर खासगी जमीन संपादनाची प्रक्रिया प्रलंबीत आसा. तातूंतली 6.19 हेक्टर जमीन संपादीत करपाची प्रक्रिया सुरू आसा. 6.19 हेक्टर जमनींतली 3.98 हेक्टर जमीन संपादीत करपाक गोंय सरकारान मान्यताय दिल्या. 6.017 हेक्टर जमीन संपादीत करपा विशींची अधिसुचोवणी जारी जाल्या. मार्च 2020 त अधिसुचोवणी जारी जाल्ली. हाचे उपरांत गोंय सरकारान फुडली प्रक्रिया करूंक ना, असो स्थितीजन्य अहवाल बसकेंत सादर जालो.
दक्षीण गोंय जिल्होधिकाऱ्यांनी जमीन संपादनाची प्रक्रिया फुडें व्हरची. गोंय सरकारान रेल्वे मंत्रालयाक जमनीचो ताबो दिल्या उपरांत कामाक नेट येतलो, असो विचार बसकेंत जालो.
रेल्वे दोट्टीकरण हो फाटल्या विधानसभा वेंचणुकेंत प्रचाराचो मुखेल मुद्दो आशिल्लो. काँग्रेस पक्षा सयत बिगर सरकारी संघटणांनी रेल्वे दोट्टीकरण प्रकल्पाआड आंदोलन केल्लें. सध्या भाजपांत आशिल्ले दिगंबर कामत, संकल्प आमोणकार हे ह्या आंदोलनांत आशिल्ले. कोळशाचे येरादारी खातीर रेल्वे दोट्टीकरण प्रकल्प जाता, असो आरोप रेनबो वॉरीयर्स सयत हेर बिगर सरकारी संघटणांनी केला. मुरगाव बंदरा सावन रेल्वेच्या माध्यमान हॉस्पेट हांगा कोळसो व्हरपा खातीर रेल्वेचे दोट्टीकरण जाता, असो आरोप काँग्रेसी सयत दोट्टीकरणाक विरोध करपी संघटणांनी केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
