भांगरभूंय | प्रतिनिधी
भांगरभूंय । प्रतिनिधी
काणकोणः काणकोण रेल्वे स्टेशनांत लांब पल्ल्याच्या पॅसेंजर रेल्वेंक थांबो दिवपाचे मागणे खातीर शुक्रराक सकाळीं काणकोण रेल्वे थांबो बचाव कृती समितीन ज्येश्ठ नागरिकांक घेवन रेल्वे स्टेशना कडेन उपास आंदोलन केलें. कोंकण रेल्वेचो ज्येश्ठ येरादारी वेवस्थापक सुनील नाडकार हांणी थांब्या सबंदी फुडल्या सप्तकांत बसका घेवपाचें उतर दिल्ल्यान तशेंच काणकोणचो मामलेदार मनोज कोरगांवकार बसका घेवपाचें मानून घेतिल्ल्यान दनपारां आंदोलकांनी उपास फाटीं घेतलो.
केआरसी बुकींग कावंटरा सामकार केल्ल्या ह्या उपास आंदोलनांत काणकोण ज्येश नागरीक मंचाचे वांगडी आनी बायलो मेळून शंबरां परस चड लोक वांटेकार जाल्ले. ह्या वेळार रेल्वे स्टेशन आनी रेल्वे नियंत्रण रुमांत आंदोलकांनी वच्चें न्हय म्हणून पुलीस बंदोबस्त दवोरल्लो. आंदोलनांत धीरज नायक गांवकार आनी शुभम कोमरपंत, कृती समितीचे समन्वयक जनार्दन भंडारी, संयोजक शांताजी नायक गांवकार, समाज वावुरपी उल्हास भाटीकार, नातिविदाद डिसा, दिलखुष शेट, अनिल भगत, बाबू कोमरपंत, आदलो नगराध्यक्ष राजेंद्र देसाय, श्यामसुंदर देसाय, संदेश तळेकार आनी मुखेल नागरिकांनी वांटो घेतिल्लो. ‘हम होंगे कामयाब’, हें पद म्हणटना आंदोलक दिसताले.
थांबे परत सुरू करपा संबंदी कोकण रेल्वेन जाय तो निर्णय घेतलो ना जाल्यार रेलमार्ग आडावपाची आमची तयारी आसा अशें आंदोलकांनी सांगलां. काणकोणचो मामलेदार मनोज कोरगांवकार आनी पुलीस निरीक्षक चंद्रकांत गांवस हांणी आदोलकां कडेन उलोवणी करून तांका समजवपाचो यत्न केलो. पोरूं मार्च म्हयन्यांत कोंकण रेल्वेच्या अधिकाऱ्यांनी आंदोलकां कडेन चर्चा करपाची तयारी दाखोवन लेगीत ते चर्चा करपाक आयले नात. ताका लागून आंदोलन तिडकल्ले. मामलेदार कोरगांवकारान तांच्या वांगडा बसका आयोजीत करपाचें उतर आंदोलकांक दिलां.
रेल्वे थांबो आंदोलनाक तेंको दिवपा खातीर कांय टुरिस्ट टॅक्सीवाले आंदोलनांत वांटेकार जाल्ले. कोकण रेल्वे अधिकारी अजून न्हिदेंतल्यान जागे जायनात जाल्यार आमकां दुसरे पद्दतीचें आंदोलन सुरू करचें पडटलें अशी शिटकावणी जनार्दन भंडारी हांणे दिल्या. कोकण रेल्वेचो ज्येश्ठ येरादारी वेवस्थापक सुनील नाडकार हांणी फुडल्या सप्तकांत रेल्वे अधिकाऱ्या वांगडा आंदोलकांची बसका घेवपाचें मानून घेतिल्ल्यान आंदोलन तात्पुरतें बंद केलां. बसकेची तारीक आनी वेळ आंदोलकांक कळयतले अशें नाडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
