भांगरभूंय | प्रतिनिधी
प्रवाशान केलो व्हिडियो व्हायरल
पणजी, प्रतिनिधी ः रेल्वेतल्यान प्रवास करतना जायते जाण रेल्वेंत तयार केल्ली खाणां खातात. कांय खाणां बरी आसतात तर कांय खाणां बरी नासतात, अशें जायते फावटीं आमी आयकलां. थोड्यांक अणभवूय आयला आसतलो. इतलेंच न्हय तर खाणांनी जल्ले, केस मेळटात. ह्या खाणां विशीं आतां प्रस्न निर्माण जावपाक लागला. असोच एक व्हिडियो बिरेस्तारा सोशल मीडियाचेर व्हायरल जाला. तो मडगांव एक्सप्रेसांतल्यान गोंया वटेन येवपी एका प्रवासान काडला. तातूंत रेलगाडयेंतले पॅन्ट्रींत तयार करुन दवरिल्ल्या खाणांत हुंदीर तोंड घालतात अशें दिसता. ते पळोवन लोकांनी रेल्वे प्रशासनाचेर तिडक उक्तायला.
ह्या प्रवाशान पयलीं इंस्टाग्रामाचेर व्हिडियो शेअर केलो आनी नेमके कितें घडलें हाची सविस्तर म्हायती दिली. रेल्वेचो प्रवासी म्हूण ही घडणुक दुख्ख दिवपा सारकी आशिल्ली. 14 ऑक्टोबराक हांव म्हज्या कुटुंबासयत 11099 मडगांव एक्सप्रेसांतल्यान प्रवास करतालो. रेल्वेची नियोजीत वेळ दनपारां 1.45 वरांचेर आशिल्ली. पूण, दनपारां 3:30 वरांचेर ती स्टेशनाचेर पावली. कांय वस्तू घेवपा खातीर रेलगाडयेंतले पॅन्ट्रींत नदर मारली तेन्ना म्हाका खरोच धक्को बसलो. पॅन्ट्रींत उण्यांत उणे 6-7 उंदीर हांवेन पळयले अशें प्रवाशान पोस्टांत बरयलां.
व्हिडियो – https://fb.watch/nMAoqN8Mne/
आरपीएफान टाळाटाळीचें जापो दिल्याचो आरोप
हांवें आरपीएफ कडेन कागाळ करपाचो यत्न केलो, पूण तांणी सरळ जाप दिली ना. ह्या ट्रॅका सकयल ४०० ते ५०० उंदीर आसात. तातूंतले 4- 5 जाण गाडयेंत भितर सरले जाल्यार कितें जालें? अशी जाप तांणी दिली असो आरोप प्रवाशान केला. उपरांत हांव असिस्टंट स्टेशन मास्टर मीना सर हांचे कडेन गेलो. ताणें पॅन्ट्रीं वेवस्थापकाक फोन केलो. हांवें तांकां ही सगळी घडणूक सांगली अशें प्रवाशान सांगलें.
लोकांनी अशी प्रतिक्रिया दिली
हो व्हिडियो सोशल मिडियाचेर बरोच व्हायरल जावपाक लागला. हो व्हिडियो व्हायरल जाले उपरांत लोकांनी वेगवेगळी प्रतिक्रिया दिल्या. एका वापरप्यान बरयलां, ‘रेलगाडयेंत अशी बेपरवाय अयोग्य आसा. हे विशीं रेल्वेन कारवाय करची. जाल्यार रेल्वेन लोकांच्या भलायके कडेन खेळचें न्हय, अशें दुसऱ्या वापरप्यान बरयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
