रेईश मागुशच्या आमदार केदार नायक हांच्या पॅनलांतले 5 उमेदवार बिनविरोध

भांगरभूंय | प्रतिनिधी

भांगरभूंय । प्रतिनिधी
पर्वरीः रेईश मागुश पंचायत वेंचणूक लडोवपी आपल्या पॅनलांतले 5 उमेदवार बिनविरोध वेंचून आयल्यात अशी म्हायती साळगांवचो आमदार केदार नायक हांणी दिल्या. उमेदवारी अर्ज फाटीं घेवपाच्या बुधवाराक प्रतिस्पर्धींनी तांचे उमेदवारी अर्ज फाटीं घेतिल्ल्यान हे उमेदवार बिनविरोध वेंचून आयल्यात.
नैना जयप्रकाश नायक (वॉर्ड 10), संगीता भोसले (वॉर्ड 9), सुभाष पेडणेकार (वॉर्ड 4), झेवियर रिबेलो (वॉर्ड 1) आनी उमेश मयेकार (वॉर्ड 3) अशी बिनविरोध वेंचून आयिल्ल्या उमेदवारांची नांवां आसात. आपूण सरपंच आसतना रेईश मागुश पंचायत वाठारांत केल्ल्या उदगतीचें इनाम म्हणून लोकांनी आपल्या पॅनलांतल्या पांच उमेदवारांक बिनविरोध वेंचून दिल्यात असो दावो केदार नायक हांणी केला. वॉर्ड नंबर 2तल्या वेंचणूक लडोवपी आमच्या पॅनलांतल्या सुश्मिता पेडणेकाराक लोक व्हडा मताधिक्यान वेंचून दितले आनी ती रेईश मागुशची सरपंच जातली अशें नायक हांणी जाहीर केलां.
आपली आवय नैना नायक बिनविरोध वेंचून आयली हाची खोस जाता. तिचो आवय-बापूय सुटके झुजारी आशिल्ले आनी तिका समाज वावराची आवड आसा अशें केदार नायकान सांगलें. नेरूल, पिळर्ण- मार्रा, साळगांव, सांगोल्डें आनी गिरी पंचायत वेंचणुकेंत आपल्या पॅनलाक जैत मेळटलें असो विस्वास तांणी उक्तायला.
पूत केदार नायक हांणी केल्ल्या समाज वावराक लागून आपणाक मतदारांनी बिनविरोध वेंचून दिलां. वॉर्डाची उदगरत करपा कडेन आपूण लक्ष दितलें. समाज वावराची म्हाका पयलीं सावन आवड आसा अशें नैाना नायक हिणे सांगले. संगीता भोसले, सुभाष पेडणेकार, झेवियर रिबेलो  आनी उमेश मयेकार हांणी बिनविरोध वेंचून दिल्ले खातीर वॉर्डांतल्या लोकांचे उपकार मानले.