भांगरभूंय | प्रतिनिधी
माड- बाणसाय (कुडचड्यां) बुधवारा रातीं जें कितें जालें, तें गोंय कायद्याच्या हाता भायर वचपाक लागिल्ल्याचें चिन्न म्हणल्यार कोणाक वायट दिसचें न्हय. घुंवळे वखदां, ताचे कडेन संबंदीत गुन्यांवांक लागून फाटल्या कांय दिसांनी गोंयचें नांव बदनाम जायत आसा. फोगाट प्रकरणांत तर फक्त थळ गोंय. ड्रग्स व्हरून दिवपी 2-3 आडवाद सोडल्यार, सगलेच भायले. पूण, जणू काय सगले गोंयकारूच हाका जापसालदार, अशे तरेन राज्या भायलीं प्रसार माध्यमां खबरो चलयतालीं. आतां हें रेंव माफियाचें नवें प्रकरण. घडयें पयलेंच आसत. पुलिसांच्या मतान, बुधवारा मध्यानरातीं देड- दोनांक व्हडलें व्हडें घेवन तीन कामगार बेकायदेशीरपणान रेंव उसपिताले. इतल्यान तांचेर फारपेट जालो. एकलो सोंपलो, दुसऱ्याक गुळी लागल्या, तिसरो वाटावलो. कांय पुलिसांच्याच मतान, रानदुकराक मारपाक फार मारिल्ले, ते हांकां लागले. हें बरय मेरेन, खरें कितें फट किते, तें सारकें उजवाडांत येवंक नाशिल्लें. घडणूक थळाचो बारीकसाणेन तपास जाला. सत्य बेगीन भायर येवचें. मात, हें रेंव माफियांचें कर्म आसल्यार गोंय हिंसेच्या वेगळ्या मोडणार वचपाची भिरांत न्हयकारपाक येना.
बांदकाम वेवसाया खातीर रेंवेंचो वापर करचोच पडटा. चिरेय लागतात. घरां उबारपाचें वेगळे तंत्रज्ञान अजून आमकां संवकळीचें ना. तातूंत गोंयांत सवायशें तें देडशें इंच पावस पडटा. हांगाचें हवामानूय ओलें. म्हणटकच रेंव, शिमिट, चिरे वापरून मजबूत घरां बांदचींच पडटा. तशें थारावीक वर्सांनी गोंयांत घरां बांदपाचें ल्हार येता. दिसपट्टींय बांदकाम चालू आसतात. देखून चिरे, रेंव हांकां खूब मागणी. महाराष्ट्रांतल्यान रेंवेंचे ट्रक येतात. मात, गोंयचे रेंवकार ते आडावन परत धाडटात. गोंयांत रेंव उसपुपाचेर बंधनां आसात. जाचेर बंदी, बंधना, नियंत्रण आसता ती प्रत्येक गजाल चोरयां, बेकायदो वा लांच दिवन जाता. गोंयच्या भोवतेक न्हंयांनी रातच्या वेळार वा दिसाचें रेंव उसपुपाचें काम चलता. भोव करून बेकायदेशीर. ते विशीं सगल्याच दिसाळ्यांनी खबरो येतात. अदीं मदीं पुलीस, सरकारी यंत्रणेची कारवाय जाता. रेंवेंच्यो राशी जप्त जातात. पूण मागीर कितें जाता, तें कोणाकूच कळना. ह्या रेंव वेवसायांत एकमेकांच्या बरेंपणान भितरल्यान वेव्हार जायनात मूं? वर्साचे बाराय म्हयने हात ओलेच उरचे म्हूण कोण आशेभक्त हे वेवसाय अशेच चलोवपाक सोदिना मूं? रेंव उसपुवप कायद्या वरवीं नियमित करप शक्य ना? सैमाक त्रासांत घालिनासतना तो चलपाक शकना? संबंदीत खात्यांच्या मुखेल्यांनी, लोकप्रतिनिधींनी, पर्यावरण जाणकारांनी एकठांय बसून हाचेर तोडगो काडपाक जाय. रेंव उस्पिल्ल्यान न्हंयेच्यो धडो कोसळून उदक गांवांत घुसपाची शक्यताय आसा. सैमाचो इबाड जावं येता. दुसरे वटेन रेंव नाशिल्ल्यान बांदकामां आडकून उरल्यांत, अशी लोकांची, बिल्डरांची कागाळ. हाचोय विचार जावंक जाय. बाणसायची घडणूक ही वयलेचाराक घेवची न्हय. जर खरेंच तातूंत रेंव माफिया घुस्पल्ल्यात (कांय पुलिसांच्या मतान ही दुर्घटना अशें छापून आयलां.) जाल्यार सरकारी यंत्रणेन आतांच सादूर राविल्लें बरें.
महाराष्ट्रांत अहमदनगरांत 2017 त रेंव माफियांनी एके बायल अधिकाऱ्याक जिवी लासपाचो यत्न केल्लो. ताचे पयलीं एका अधिकाऱ्याक पॅत्रोल ओतून लासून मारिल्लो. बेकायदा कामां करपी हे माफिया आनी तांणी पोशिल्ले गुंड प्रवृत्तीचे लाचार लोक कितें करीत ताचो नेम ना. अजून महाराष्ट्र, युपी, बिहारांत काळ्या धंद्यांनी घुस्पल्ल्या ह्या राष्ट्रद्रोही भारतीयांचीं कर्मां चालूच आसात. सरकारी यंत्रणेक हाता कडेन धरून हें चल्लां. कांय सरकारी अधिकारी धाड घालचे बदला हातांत आयिल्ले दुडूर्र ब्रह्मा, दुडूर्र विष्णू… घेवन ओगी रावतात. ते न्हयकारून धाड घालपी थोडे अधिकारी आसात. ते तातूंत येशस्वी जातात कांय वेळार जिवूय वगडायतात. बाणसाय रेंव प्रकरणाचो पुलिसांनी बेगीन सोक्षमोक्ष लावचो.
हातूंत पेजाद व्यक्ती घुस्पल्ली आसल्यार तिची इल्ली हवा सोडून तिकाय ल्हव करची. कितलो तेंप म्हूण हें चलोवन घेतले?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
