भांगरभूंय | प्रतिनिधी
मांडवी, जुवारी, शापोराची रेंव काडपाक मेळपाची, जिल्हो सर्वे अहवाल तयार
भांगरभूंय । सिद्धार्थ कांबळी
पणजीः मांडवी, जुवारी आनी शापोरा ह्या तीन न्हंयांतल्यान कायदेशीर रेंव उत्खनन करपाची प्रक्रिया खण खात्यान पुराय केल्या. जिल्होधिकाऱ्यान जिल्हो सर्वे अहवाल (डीएसआर) सुचोवणी आनी हरकतीं खातीर उक्तो केला. पूण कायदेशीर रेंव उत्खननाक गरजेचे पर्यावरणीय दाखले दिवपी पर्यावरणीय प्रभाव मुल्यांकन प्राधिकरणूच सध्या अस्तित्वांत नाशिल्ल्यान खण खात्याक दाखले मेळप कुस्तार जालां.
खण खात्याच्या वरिश्ठ सुत्रांनी दिल्ले म्हायती प्रमाण, कायदेशीर रेंव उत्खनना खातीर जिल्होधिकाऱ्यांचो जिल्हो सर्वे अहवाल म्हत्वाचो आसता. ह्या अहवालांत खंयचे न्हंयेंतल्यान कितली रेंव काडपाक मेळटा, न्हंयेच्या खंयचे खंयचे सुवाते वयल्यान रेंव काडपाक मेळटा, हें स्पश्ट केल्लें आसता. शापोरा न्हंयेचो सर्वे जिल्होधिकाऱ्यान हे आदींच तयार केला. ते उपरांत आतां मांडवी आनी जुवारी ह्या दोनूय न्हंयांचो सर्वे करून ते संबंदांतलो अहवाल लोकांच्यो सुचोवण्यो आनी हरकती खातीर उक्तो केला. जिल्हो सर्वे अहवाल जिल्होधिकाऱ्या कडल्यान मेळ्ळे उपरांत खण खात्यान केंद्राच्या परिवेश पोर्टला वरवीं पर्यावरणीय प्रभाव मुल्यांकन प्राधिकरणा कडेन पर्यावरणीय दाखल्लयां खातीर अर्ज केलो. त्या वेळार हें प्राधिकरण सध्या अस्तित्वांत नाशिल्ल्याचें दिसून आयलां, अशें सुत्रांनी सांगलें.
आनीक कांय दीस वाट पळोवची पडटली
न्यायालयाच्या आदेशा प्रमाण गोंयांतलें रेंव उत्खनन फाटल्या कांय वर्सां सावन बंद आसा. ताचो व्हड प्रमाणांत मार गोंयकारांक बसता. गोंयांतलें रेंव उत्खनन बंद आशिल्ल्यान गोंयकारांक दुसऱ्या राज्यांतल्यान येवपी रेंवेचेर निंबून रावचें पडटा. ती रेंव म्हारग आशिल्ल्यान चड पयशे खर्च पडटात. दुसरे वटेन रेंवेच्या उणावाक लागून न्हंयांतल्यान बेकायदो तरेन रेंव काडपाचे प्रकार वाडल्यात. ताका लागून रेंव उत्खनन कायदेशीर करपाचो निर्णय मुख्यमंत्र्यान घेतला आनी कायदेशीर रेंव उत्खननाची प्रक्रिया झुजा पांवड्यार सुरू करपाचे निर्देश खण खात्याक दिल्ले. ते प्रमाण खात्यान ही प्रक्रिया सुरू केल्या. पूण पर्यावरणीय प्रभाव मुल्यांकन प्राधिकरण अस्तित्वांत नाशिल्ल्यान पर्यावरणीय दाखल्यां खातीर खात्याक आनीक कांय दीस वाट पळोवची पडटली.
प्राधिकरणाची मुजत सोंपल्या नोव्हेंबरांत
पर्यावरणीय प्रभाव मुल्यांकन प्राधिकरणाची मुजत 24 नोव्हेंबर 2023 ह्या दिसा सोंपल्या. ते उपरांत नवें प्राधिकरण अधिसुचीत करपाची प्रक्रिया पर्यावरण खात्यान सुरू केल्लया. फुडल्या कांय दिसांनी प्राधिकरण अधिसुचीत जातलें. हें प्राधिकरण खण खात्या कडल्यान आयिल्ल्या अर्जाचो अभ्यास करून कायदेशीर रेंव उत्खननाक मंजुरी दिवपाचो निर्णय 45 दिसांनी घेतले, अशी म्हायती पर्यावरण खात्याच्या अधिकाऱ्यान ‘भांगरभूंय’ कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
