भांगरभूंय | प्रतिनिधी
शापोरा न्हंयेंत परवान्या खातीर मागयल्यात अर्ज
भांगरभूंय । प्रतिनिधी
पणजीः राष्ट्रीय दर्या विज्ञान संस्थेन शापोपा न्हंयेचो अहवाल दिले उपरांत परंपरीक पद्दतीन रेंव काडपाक परवानो दिवपाची प्रक्रिया सरकारान सुरू केल्या. खण खात्यान परवान्यां खातीर इत्सुकां कडल्यान ऑनलायन अर्ज मागयल्यात. हाका लागून जानेवारी सावन रेंवेचो उणाव पयस जातलो.
राष्ट्रीय हरीत लवादाच्या बंदी आदेशाक लागून गोंयांत रेंव काडपाचेर बंदी आसा. हाका लागून बांदकामां खातीर दुसऱ्या राज्यांतल्यान रेंव हाडची पडटा. रेंव म्हारग जाल्ल्यान सामान्य लोकांक बांदकाम करप परवडना.
आतां शापोरा न्हंयेंत रेंव काडपाची प्रक्रिया सुरू जातली. शापोरा न्हंयेंत परंपरीक पद्दतीन रेंव काडपा खातीर खण खात्यान ऑनलायन अर्ज मागयल्यात. अर्ज 8 जानेवारी मेरेन करचे पडटले. शापोरा न्हंयेंत 1, 2, 5 आनी 6 नंबराच्या झोनांत हातान रेंव काडपाक मेळटली. परवानो धारकांक वर्साक 1 हजार क्युबीक मिटरा मेरेन रेंव काडपाक मेळटली. सकाळीं 6 ते सांजेच्या 6 वरां मेरेन रेंव काडपाक मेळटली. यांत्रीक पद्दतीन रेंव काडपाक मेळची ना. अर्ज करून शुल्क भरले उपरांतूच रेंव काडपाक परवानगी मेळटली. राष्ट्रीय दर्याविज्ञान संस्थेन रेंव काडपा विशीं शापोरा न्हंयेचो अहवाल सादर केला. रेंव काडपाची प्रक्रिया खंडपिठाच्या आदेशा प्रमाण जातली. न्हंयेंत खंयच्या वाठारांत रेंव काडप शक्य आसा, तें विशींचो अहवाल तयार करपाचो वावर एमआयओ करता. एनआयओन अहवाल सादर केले उपरांत परवाने दिवपाक मेळटले. हो प्रस्न खंयपिठांत आसा. खंडपिठाच्या आदेशाक पाळो दिवन रेंव काडपाचें परवाने खण खात्याक दिवचे पडटले. शापोरा न्हंयेचो अहवाल सगळ्यांत पयलीं सादर जाला. मांडवी, जुवारी आनी तेरेखोल न्हंयांचो अहवाल सादर जाले उपरांत त्या न्हंयांनी रेंव काडपाचे परवाने दिवपाची प्रक्रिया सुरू जातली, अशें मुख्यमंत्री डॉ. प्रमोद सावंत हांणी सांगलां.
चिरे काडपाकूय दितले परवाने
चिरे काडपाक परवाने दिवपाची प्रक्रिया हाचे आदीं सुरू जाल्या. चिऱ्याच्या परवान्या खातीर खण खात्या कडेन अर्ज करचे पडटलो. तशेंच भारत सरकाराच्या पोर्टलाचेर पर्यावरण दाखल्या खातीर अर्ज करचो पडटलो. पर्यावरणीय दाखलो मेळ्ळे उपरांत खण खातें चिरे काडपाचो परवानो जारी करतलें. कोमुनिदाद जमनींत चिरे काडपा खातीर कोमुनिदाद समितीचो ना हरकत दाखलो घेवचो पडटलो. कोमुनिदाद समितीचो दाखलो मेळ्ळे उपरांत पर्यावरण दाखल्या खातीर भारत सरकाराच्या पोर्टलाचेर अर्ज करचो पडटलो. सगळी प्रक्रिया पुराय जावपाक 30 ते 45 दीस लागतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
