भांगरभूंय | प्रतिनिधी
-पयलीं भशेन महाराष्ट्रातल्यान रेंवेचें ट्रक येतले गोंयांत
– निलेश राणेच्या मध्यस्थीक येस
– रेंव ट्रक संंघटणांची जाली बसका
– गैरसमजुतींल्यान ट्रक वेवसायिकां मदीं वाद
पणजी: गोंय आनी महाराष्ट्रांतल्या रेंव ट्रक संघटणां मदल्या वादाचेर उपाय काडपाक येस आयिल्ल्यान पयलीं भशेन परतून महाराष्ट्रांतल्यान रेंवेचें ट्रक गोंयांत येवपाक सुरवात जातली. मुख्यमंत्री डॉ. प्रमोद सावंत हांचे फुडारपणा खाला महाराष्ट्र तशेंच गोंयच्या रेंव संघटणांची बसका जाली. हे बसकेंत आमदार जीत आरोलकार आनी महाराष्ट्रांतले फुडारी निलेश राणे हाजीर आशिल्ले.
दोनूय संघटणां मदीं गैरसमजुतींतल्यान वाद निर्माण जाल्लो. हाचेर उपाय काडिल्ल्यान आतां पयलीं भशेन रेंवेचें ट्रक सुरू जातलें, अशी म्हायती बसके उपरांत मुख्यमंत्री डॉ. प्रमोद सावंत, महाराष्ट्रांतले फुडारी निलेश राणे आनी आमदार जीत आरोलकार हांणी दिली.
राष्ट्रीय हरीत लवादाच्या स्थगिती आदेशाक लागून गोंयांत रेंव काडपाचेर बंदी आसा. हातूंत परत बेकायदाे रेंव काडप्यां आड खण खात्यान कारवाय सुरू केल्या. हांतूंत महाराष्ट्रांतल्यान येवपी रेंवेचें ट्रक बंद जाल्ल्यान गोंयांत रेंवेचो उणाव निर्माण जाल्लो. बांदकाम वेवसायिकांक म्हारग दरान रेंव घेवची पडटाली. रेंव मेळनाशिल्ल्यान बांदकामांचेर परिणाम जातालो. गोंय आनी महाराष्ट्रांतल्या रेंव येरादारी करपी ट्रकवाल्यां मदीं वाद निर्माण जाल्ल्यान ही समस्या निर्माण जाल्ली. हाचेर उपाय काडपा खातीर महाराष्ट्र आनी गोंय रेव संघटणा पदाधिकाऱ्यांची मुख्यमंत्री डॉ. प्रमोद सावंत हांचे सयत बसका जाली. आमदार जीत आरोलकार हांचे मध्यस्थीन ही बसका जाली. बसकेक महाराष्ट्रांतले फुडारी निलेश राणे हाजीर आशिल्ले.
महाराष्ट्रांतल्यान रेंवेचें 300 ट्रक गोंयांत येतात. गोंयचे 140 ट्रक महाराष्ट्रांतल्यान रेंव घेवन येतात. गोंयच्या ट्रकांची वळेरी महाराष्ट्रा कडेन आसतली आनी महाराष्ट्रांतल्या ट्रकांची वळेरी गोंयां कडेन आसतली. 500 रुपयांच्या ट्रान्सीट परवान्याचेर ही येरादारी जातली. नव्या ट्रकवाल्यांनी संघटणे कडेन नोंदणी करून पास घेवचो पडटलो. शिमेचेर तपासणी जातली. महाराष्ट्रांत रेंवेची येरादारी करपी ट्रकवाल्यांच्यो दोन संघटणा आसात. दोनूय संघटणांचे पदाधिकारी बसकेक हाजीर आशिल्ले. 5 जानेवारी सावन ट्रक सुरू जातलें, अशी म्हायती जीत आरोलकार हांणी दिली.
बांदकामां खातीर रेंवेचो उणाव जावचो ना : मुख्यमंत्री
महाराष्ट्राचे फुडारी निलेश राणे हांचे मध्यस्थीन महाराष्ट्र आनी गोंयच्या रेंवेच्या ट्रकवाल्यां मदलो वाद आतां सोंपला. पयलीं भशेन महाराष्ट्रांतल्यान रेंवेचें ट्रक गोंयांत येवपाक लागतले. बांदकामां खातीर आतां रेंव उपलब्ध जातली. रेंवेचो उणाव पयस जातलो, अशें मुख्यमंत्री डॉ. प्रमोद सावंत हांणी सांगलें.
ट्रकवाल्यां मदीं गैरसमजुतींतल्यान वाद जाल्लो. हो वाद सुटला. पयलीं जशे रेंवेचें ट्रक गोंयांत येताले, तशेंच आतां येवपाक लागतले.
-निलेश राणे
जीत अारोलकार
गोंयांत रेंव काडपाक परवानगी ना. हाका लागून हेर राज्यांतल्यान येवपी रेंवेचेर बांदकामां सुरू आसात. कांय कारणाक लागून रेंवेचें ट्रक बंद जाल्ले. ते परतून सुरू जातले. गोंयांतले ट्रक महाराष्ट्रांत वचून रेंव हाडटले. महाराष्ट्रांतले ट्रक रेंव घेवन गोंयांत येतले.
-जीत आरोलकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
