भांगरभूंय | प्रतिनिधी
संवसारीक फुटबॉल सर्तीचे सेगीत दुसरे मॅचींत एकवटेन निकाल पळोवपाक मेळ्ळो. 1966चो संवसारीक वस्ताद इंग्लंडाच्या युवा ब्रिगेडीन तोखणाय करपा सारक्या खेळाच्या नेटार आशियायी चॅम्पियन इराण पंगडाक 6-2 अशा फरकान हारयलो.
ज्यूड बेलिंगहॅम, बुकायो साका (दोन गोल), रहीम स्टर्लींग, जॅक ग्रेलीश आनी मार्कस रॅशफोर्ड ह्या इंग्लंडाच्या फुडारांतल्या स्टार खेळगड्यांनी गोल केले. इराणा वतीन दोनूय गोल मेहदी तरेमीन केले.
इंग्लंडान सुरवाती सावन मॅचीचेर पकड मेळोवपाचो यत्न केलो. ताणें बॉल आपल्या नियंत्रणांत दवरीत इराणाच्या गोलकीपराचेर कायम चेपन निर्माण केलें. मजगतीं, इराणाचो गोलकीपर बैरानवांदच्या नाकाक दुखापत जाली. ताका लागून दुसरो गोलकीपर मोसैनीक मैदानांत देंवयचो पडलो.
ते उपरांत इराणान आक्रमक रुप आपणावपाचो यत्न केलो. पूण, इंग्लंडान परतून नियंत्रण मेळयत इराणाच्या गोलपोस्टाचेर सातत्यान चाल केली. मजगतीं, इंग्लंडाचे दोन यत्न फसल्या उपरांत 35व्या मिनटाक ज्यूड बेलिंगहॅमान हेडर वरवीं इंग्लंडाचो पयलो गोल केलो.
ते उपरांत मध्यांतर जावपाक कांय मिनटां बाकी आसतना बुकाओ साकान दाव्या पांयान नेटाचो फटको मारून 43व्या मिनटाक दुसरो गोल केलो.
ते उपरांत मध्यांतरा उपरांत इंज्युरी टायमांत मुखेली हॅरी केनान रहीम स्टर्लिंगाक एक जबरदस्त पास दिलो. हाचेर स्टर्लिंगान कसलीच चूक करिनासतना बॉल गोलपोस्टांत घालून इराणा वयली आघाडी 3-0 अशी केली.
इंग्लंडान मध्यांतरा मेरेन सात शॉर्ट्स इराणच्या गोलपोस्टाचे दिकेन खेळ्ळे. तातूंतले चार ऑन टार्गेत आशिल्ले. तातूंतल्या तिनांचेर गोल करपाक येस आयलें. जाल्यार इराणान एकूय शॉट इंग्लंडाच्या गोलपोस्टा वटेन मारूंक ना. इंग्लंडान मध्यांतरा मेरेनूच 407 पास दिल्ले. जाल्यार इराणान 88 पास दिवपाक येस मेळयिल्लें.
मध्यांतरा उपरांत इंग्लंडान आपलो गोल करपाचो धडाको कायम दवरलो. इंग्लंडाचो फॉरवर्ड खेळगडो बुकायो साकान आपलो दुसरो आनी पंगडाचो चवथो गोल केलो.
इंग्लंडान चवथो गोल केल्या उपरांत इराणान फक्त तीन मिनटांनी इंग्लंडाक प्रत्युत्तर दितना मॅचींतलो आपलो पयलो गोल केलो. मेहदी तारेमीन घोलीजादेहच्या पासाचेर गोल करीत पंगडाचें खातें उगडलें.
इराण आपल्या पयल्या गोलाचो आनंद मनयत आसतना इंग्लंडान 71व्या मिनटाक इराणाचेर पांचवो गोल केलो. मार्कस रॅशफोर्डान हॅरी केनाच्या पासाचेर हो गोल जालो. 89व्या मिनटाक जॅक ग्रिलीशान गोल करून इंग्लंडाची गोलसंख्या स चेर व्हेली. अखेरेक मेहदीक पॅनल्टी कीक मेळ्ळी आनी इराणान आपलो दुसरो गोल करून मॅच सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
