भांगरभूंय | प्रतिनिधी
फोगट मरण प्रकरण; आनीक तिगांक अटक, कर्लीस बार ‘सीलबंद’
सुधीर सांगवान, सुखविंदराक 10 दिसांची पुलीस कोठडी
भांगरभूंय I प्रतिनिधी
म्हापशेंः हरियाणांतली भाजप फुडारी तशेंच टिकटॉक स्टार सोनाली फोगट हिचो खून घुंवळे वखदां (ड्रग्स) दिवन केल्ल्याचे उक्तें जालां. दुबावितांक ड्रगसाची पुरवण केल्ले खातीर कर्लीस क्लबाचे धनी अॅडवीन न्यूनीस (हणजूण) अानी ड्रग्स पेडलर्स रुमबॉय दत्तप्रसाद गांवकार (सोनाळ, वाळपय) ह्या दोगांकूय पुलिसांनी अटक केल्या.
ह्या प्रकरणांत हॉटेलाचो रूमबॉय दत्तप्रसाद हो ‘ड्रग्स पेडलर्स’ थारला. मजगतीं, दुबावीत रुमबॉय दत्तप्रसाद हाका ड्रग्स दिवपी दुबावीत रामदास मांद्रेंकार (हणजूण) हाका पुलिसांनी अटक केल्या. ताका लागून आतां मेरेन अटक केल्ल्या दुबावितांचो आंकडो पांच जाला.
फोगट प्रकरणांत आतां मेरेन चार जाणांक अटक केल्या. ही संख्या वाडपाची शक्यताय आसा.
मजगतीं, फोगट खून प्रकरणांतलो दुबावीत सुधीर सांगवान आनी सुखविंदर पाल सिंग ह्या दोगांक म्हापशें पयलो वर्ग न्यायालयान 10 दिसांची पुलीस कोठडेंत दवरपाचो आदेश दिला.
जाल्यार कर्लीस बीच क्लबाच्या बायलां शौचालयांत 2.20 ग्रॅम मेथाफेटामायन हो ड्रग्स मेळिल्ल्यान पुलिसांनी क्लब सील केलां. ह्या ड्रग्साचें मोल 6 हजार रुपया आसा.
शुक्रारा फोगट मरण प्रकरणांत दुबावीत सुधीर सांगवान अानी सुखविंदर पाल सिंघ हांकां अटक केले उपरांत पुलिसांनी तांची खर चवकशी केली. सोमारा 22 वेर रातीं 8 वरांचेर कर्लीस क्लबांत पार्टीक वचपा पयलीं दुबावितांनी ग्रॅण्ड लिओनी हॉटेलाचो रुमबाय दुबावीत दत्तप्रसाद गांवकार हांचे कडेन ड्रग्साची वेवस्था करपाक सांगिल्लें. ते प्रमाण तांणी 12 हजारांचे ड्रग्स आमकां दिले. ते घेवन अामी कर्लीस क्लबांत पावले. थंय उदकांत ड्रग्स घालून सोनाली फोगट हिका जबरदस्तीन पियेवपाक दिले. तशेंच उरिल्लो ड्रग्स आमी बायलां शौचालयांत लिपोवन दवरला, असो कबुली जबाब दुबावीत सुधीर सांगवान हांणी दिलो.
पुलिसांनी कर्लीस क्लबाच्या बायलां शौचालयाची झडटी घेतली तेन्ना तांकां 2.20 ग्रॅम मेथाफेटायन ड्रग्स मेळ्ळो. ते उपरांत पुलिसांनी शेनवारा फांतोड्डेच्या सुमाराक दुबावीत रुमबॉय दत्तप्रसाद आनी क्लबाचे धनी न्यूनीस हांकां ताब्यांत घेतले.
क्लबाच्या सीसीटिव्ही फुटेजांत पार्टी वेळार दुबावीत सुधीर सांगवान हो ड्रग्स घातिल्लें उदक सोनाली फोगट हिका जबरदस्तीन पियेवपाक दिता, अशें स्पश्ट दिसता. दुबावितांक क्लबांत उक्तेपणान ड्रग्साचो वापर करपाक दिवप आनी क्लबांत ड्रग्स मेळप, तशेंच ड्रग्साची पुरवण करप ह्या आरोपा खाला क्लब धनी अॅडवीन न्यूनीस आनी रुमबॉय दत्तप्रसाद गांवकार ह्या दोगां आड गुन्यांव दाखल करून पुलिसांनी शेनवारा सकाळीं तांकां अटक केली.
ते भायर दुबावीत सुधीर सांगवान आनी सुखविंदर पाल सिंग हांचे आड ड्रग्स बाळगिल्ले प्रकरणांत दुसरो गुन्यांव दाखल केला. ह्या प्रकारा वयल्यान फोगट हिका जबरदस्तीन ड्रग्साचें उदक पियेवपाक दिवन तिचो खून केल्ल्याचे स्पश्ट जाता.
मजगतीं, दुबावीत आरोपींक म्हापशें पयलो वर्ग न्यायालयांत हजर केले तेन्ना न्यायालयान दोगांकूय 10 दीस पुलीस कोठडेंत दवरपाचो आदेश दिलो. पुलिसांनी 14 दिसांच्या पुलीस कोठडेची मागणी न्यायालया कडेन केल्ली.
दुबावितांचो जामिना खातीर अर्ज
दुबावीत अॅडवीन न्यूनीस हाणें जामिना खातीर न्यायालयांत अर्ज दाखल केला. दुबाविताक आयतारा पुलीस न्यायालयांत हजर करतले. त्या वेळार दुबाविताच्या जामीन अर्जाचेर सुनावणी जावपाची शक्यताय आसा.
आतां मेरेन 25 जाणांची जबानी नोंद
फोगट मरण प्रकरणांत पुलिसांनी ग्रॅण्ड लिओनी आनी कर्लीस बीच शॅकचे कर्मचारी आनी फोगट हिका हॉस्पिटलांत घेवन आयिल्ल्या मोटारीच्या ड्रायव्हरा सयत 25 परस चड जाणांची जबानी नोंद केल्या.
ड्रग्साची पुरवण करप्याक अटक
दुबावीत रुमबॉय दत्तप्रसाद गांवकार हाणें सुधीर सांगवान हाका दिल्लो ड्रग्स खंयच्यान हाडलो, हाचो सोद पुलीस घेतात. दुबाविताच्या जबानी प्रमाण शेनवारा रातीं रामदास च्यारीक पुलिसांनी ताब्यांत घेतला. ताची चवकशी सुरू आसा. रुमबॉय होच ड्रग्स पेडलर्स आसा वा ताणें आनीक कोणा कडल्यान ड्रग्स घेतले हाचीय चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
