भांगरभूंय | प्रतिनिधी
कोलवाळे पुलिशेंत तिगांचेर गुन्यांव नोंद
म्हापशें, प्रतिनिधी ः थियेच्या एका दोतोराक ताच्या क्लिनिकांत गरजेचीं वैजकी उपकरणां घेवपा खातीर बँकेंतल्यान ९३ लाख रूपयांचें रीण दितां अशें भासोवन ८.६७ लाखांची तोपी घाली. ह्या प्रकरणांत कोलवाळ पुलिसांनी सुशांत रमाकांत कंटक (रा. मडगांव), अनंत दत्ताराम वालावलकार (रा. सबनीसवाडो, सावंतवाडी आनी लांजेवाडी, कणकवली) आनी मुग्धा अतूल कामत (रा. रत्नागिरी) ह्या तिगां आड भा.दं.सं.च्या ४१९, ४२० आनी ३४ कलमा खाला फटयल्ल्याचो गुन्यांव नोंद केला.
ही घडणूक जून ते २५ नोव्हेंबर २०२३ मजगतीं घडली. फिर्यादींचें एक क्लिनीक आसा. तांणी ह्या क्लिनीकांत वैजकी उपकरणां हाडपाचें थारायल्लें. हे खातीर तांकां बँकेंतल्यान रीण जाय आशिल्लें. दुबावी सुशांत कंटक हो ह्या क्लिनिकांत आयलो. ताका दोतोराक रीण जाय आशिल्ल्याचें समजलें.
कोटक महिंद्रा बँकेंत आपले वळखीचे अधिकारी आसात. ते तुमकां रीण मेळोवन दिवपा खातीर पुराय प्रक्रिया करून दिवपाक शकतात, अशें दुबावितान फिर्यादी दोतोराक सांगलें. ते प्रमाण जून २०२३त दुबावी सुशांत हांणे आपले वांगडी अनंत वालावलकार आनी मुग्धा कामत हांकां बँकेचे कर्ज मंजूरी अधिकारी आशिल्ल्याचें सांगून ते फिर्यादीक मेळ्ळे.
दुबावितांनी फिर्यादी दोतोराक वयले बँकेंतल्यान ९३ लाख रूपया रीण मेळोवन दिवपाचें आस्वासन दिलें. हे खातीर प्रोसेसींग फी, कर्ज विमो, आयटी रिटर्न आनी हेर शुल्क रक्कमेच्या नांवा खाला फिर्यादीक दुबावितांनी आपल्या खात्यांत ८ लाख ६७ लाख रूपया जमा करपाक सांगलें.
रिणाचे प्रक्रिये खातीर इतले रुपया घेवनूय दुबावितांनी रीण दिवंक ना. तशेंच दुबावितां कडल्यान कसलेच तरेचो प्रतिसाद मेळनाशिल्ल्याचें पळोवन फिर्यादींन कोलवाळ पोलिशेंत कागाळ केली. ते प्रमाण पुलिसांनी दुबावितां आड गुन्यांव नोंद केलो.
फुडलो तपास पुलीस निरीक्षक विजय राणे हांच्या मार्गदर्शना खाला उपनिरिक्षक भरत खरात करतात.
मजगतीं, महाराष्ट्रांतल्या विंगड विंगड वाठारांनी सुशांत कंटक, अनंत वालावलकार आनी मुग्धा कामत ह्या दुबावितांनी खुबश्या वेवसायिकांक फटयल्ल्याच्यो घडणुको उक्ताडार आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
