भांगरभूंय | प्रतिनिधी
भांगरभूंय । खबरां मेज
पणजीः खाजगी दूर संचार कंपनी रिलायन्स जिओन सरकारी बीएसएनएल कंपनीक फाटीं उडोवन देशांतली सगल्यांत व्हड फिक्स्ड लायन सेवा दिवपी कंपनी जावपाचो मान मेळयलो. देशांत दूरसंचाल सेवा सुरू जाल्या उपरांत एक खाजगी कंपनीन पयलेच फावट हो मान मेळयला.
भारतीय दूरसंचार नियामक प्राधिकरणान (ट्राय) मंगळारा जाहीर केल्ल्या गिरायक अहवाला प्रमाण जिओचे वायरलायन गिरायक ऑगस्टांत 73.52 लाखांचेर पावल्ले. बीएसएनएलाचे गिरायक 71.32 लाख आशिल्ले. बीएसएनएल फाटल्या 22 वर्सां सावन वायरलायन सेवा दिता. जिओन तीन वर्सां आदी ती सुरू केल्ली. फाटल्या ऑगस्टांत देशांतल्या वायरलायन गिरायकांचो आंकडो वाडून तो 2.59 कोटी जाला. जुलयांत हो आंकडो 2.56 कोटी आशिल्लो.
ट्रायच्या आंकड्या प्रमाण वायरलायन सेवा वापरपी लोकांची संख्या खाजगी मळान वाडयल्या. जिओन 2.62 लााख नवे गिरायक जोडले, भारती ऍरटेलान 1.19 लाख, व्होडा आयडियान आनी टाटा टेलीसर्व्हिसान दरेकी 4,202 आनी 3,769 गिरायक जोडल्यात. बीएसएनएल आनी एमटीएनएल ह्या सरकारी कंपनींनी दरेकी 15,734 आनी 13,395 वायरलायन गिरायक वोगडायल्यात.
अहवाला प्रमाण देशांतली दूरसंचार गिरायकांचो वट्ट आंकडो ऑगस्टांत 1175 दशलक्ष जाल्लो. जिओन नवे गिरायक जोडले. शारां परस गांवगिऱ्या वाठारांत तांची चड संख्या आसा. ट्रायच्या 2022च्या गिरायक अहवालांत भारतांतल्या टेलिफोन गिरायकांचो आंकडो 117.36 कोटी वयल्यान 117.50 कोटी जाला असें नमूद केला. रिलायन्स जिओन 32.81, भारती ऍरटेलान 3.26 लाख नवे मोबायल गिरायक जोडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
