भांगरभूंय | प्रतिनिधी
च्या पिवपाचो उगम चीनांत जाल्लो. शेंकड्यांनी वर्सां पयलीं चीनी लोक च्याचीं पानां चाबडावन खाताले. कित्याक तर तीं पानां वखदीं हें तांकां कळिल्लें. अशीय एक काणी आसा, एक दीस चीनी राजा खंय गरम उदकाचो घोंट पियेत पियेत बागेन बशिल्लो. वाऱ्यान बागेतल्या च्या च्या झाडाचीं पानां उडून राजाच्या गरम उदकाच्या पेल्यांत पडलीं. त्या पानाचो अर्क उदकान गेलो. राजान त्या उदकाचो जेन्ना घोंट मारलो, ताका बरे दिसलें, एकतरेची तरतरी आयली. ते पासत च्याचीं पानां हुन उदकान घालून पिवप चालू जालें. मुखार ‘च्या’ ही जगभराचें फामाद पेय जाली. गरीब मनशा पसून गिरेस्ता मेरेन ह्या ‘च्यां’ न सगल्यांक आपले रसीक केल्यात. आमच्या गोंयांनुय च्या पियेवपी खूब लोक आसात. लागीं लागीं ९५ टक्के म्हणल्यार जाता.
चडश्यांची सकाळ हुनहुनीत च्या चो पयलो घोंटा मारून सुरु जाता. तो ताळ्यान गेलो काय आंगातले सगळे अवयव जागे जाल्ले वरीं जातात. कांय जाणाक फुटी च्या, तर काय जाणाक दुद घाल्ली च्या पिवपाक आवडटा.
च्या करपाक सामकी सोंपी. उदक सळसळावन तातून च्या पालो घालप. मातशी उकळी काडप आनी तें उदक गाळप. साकर जाय आशिल्ल्यांनी उदक सळसळतना ती घालप. ही जाली सादी च्या. तातून भीतर तरतरेचे प्रकार आसात. जशे दुदाची च्या, आल्याची, मसाल्याची, गुलाबाच्यो सुकयिल्ल्यो पाकळ्यो घालून केल्ली च्या, ग्रीन टी… अशे जायते प्रकार. थोड्यांक सामकी कारेगाद च्या जाय आसता. जोर, थंडी वा पोटांत बरें ना तेन्ना लेव खुटी च्या पितकच जिवाक बरें दिसता.
च्या पाल्याचेय जायते प्रकार मेळटात. मोठो, बारीक पालो, गुळ्या बशेन दिसपी पालो, पीठो, खर सुवादाचे पालो, नाजुक सुवादाचो पालो अशे वेगवेगळे तरेन च्या पियेवपाक लोकांक सवलत आसा.
च्या जरीय करपाक सोपी, तरीय तिचो स्वाद दरवेळा, आनी वेगळ्या सुवातेर वेगळो लागता. सकाळफुडें आपुण केल्ली च्या जर आपल्याक दिसपट्ट्या कामा खातीर जागयता, पूण त्याच चिक्रान घालून घोवान ताणें केल्ली च्या तुमकां हाडून दिली, तर ते च्याक सामको निराळोच सुवाद येता. सकाळच्यान काम करून सांजवेळा घरा थकुन पावतकच हुनहुनीत च्याचो घोंट दिसभरांतली थाकाय पयस करता.
च्या जिवीताचो महत्त्वाचो भाग जाला. वाटेर वळखीचो मनीस, इश्टीण, इश्ट, सोयरो खूप तेंपान मेळ्ळो जाल्यार ‘च्या पीवपाक यो आमगेर’ अशें आमंत्रण आमी दितात. सोयरीक थारतना तर ‘च्या चो प्रोग्राम’ हो आसताच. ऑफिसांतले आमीग टी ब्रेकाक लागसल्ल्या हॉटेलान च्या मारपाक वतात. च्या पियेत पियेत तरेतरेच्यो गजाली, दुख्खाच्यो- सुखाच्यो, आपल्यो, दुसऱ्याल्यो, भितरल्यो, भायल्यो खबरो जातात.
च्या एक खास पेय; पूण तिका सांगात दिवपी कांय खाद्यपदार्थ आसत जाल्यार च्याचो आस्वाद तेंगशेर पावता. ग्लुकोज वा मारी बिस्कीट, टोस्ट वा खारी बिस्कीट घरांतल्या च्याक वांगड दितात. उंटगाराच्या पावसान हुनहुनीत, कुरकुरीत तळिल्लीं भजीं आनी खतखतीत च्या हाचे सारकें जोडपें ना. बटाटवडो आनी सामोसा हे तर च्या चे खाशेले इश्ट.
कांय देशांनी च्या पिवपाचे विधीय आसात. ब्रिटन, चीन आनी जापान ह्या देशांनी च्या पिवपाच्यो खास पद्दती आसात. आमच्या देशांत च्या पिवपाक जरीय कसली खाशेली पद्दत नासली जाल्यार च्या घालून पिवपाक जायत्यो वस्तू आसात. कंवचेचे ग्लास, चिक्र- पिरी (कप- बशी), मगां, मातयेचे कुल्हड हातून आमकां च्या पितकच बरें दिसता. आजकाल तर ‘तंदूरी च्या’ म्हणून मातयेच्या मटक्यांनी च्या मेळटा. तरणाटी भुरग्यांक ‘चाय लाटे’ आनी ‘आयस्ड टी’ पिवपाक आवडटा. सुर सुर करून च्या पिवपांत जी खोस भोगता ताची सर्त आनी खंयच्याच दुसऱ्या पेयाक येना. चलात, एक कप च्या घेवया न्ही?
स्नेहा साळकार
8308706330
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
