राष्ट्रीय खेळां सर्तीचो गोंयाक फायदो

भांगरभूंय | प्रतिनिधी

प्रधानमंत्री नरेंद्र मोदीः पर्यटनाक, अर्थीक उदरगतीक मेळटली चालना

भांगरभूंय । प्रतिनिधी

मडगांवः राष्ट्रीय खेळां सर्त एक भारत श्रेश्ठ भारताचें प्रतीक आसा. दरेका राज्याक आपली तांक दाखोवपाची संद आसता. गोंयाक ही संद मेळ्ळ्या. गोंयान केल्ली तयारी तोखणाय करपा सारकी आसा. हे निमतान केल्ली साधन सुविधा फुडारांत गोंयच्या तरणाट्यांक, खेळगड्यांक उपेगांत येतली. गोंयांत राष्ट्रीय आनी आंतरराष्ट्रीय खेळां सर्त आयोजीत करप सोंपें जातलें. फाटल्या कांय कालांत गोंयांत कनेक्टिव्हिटी आशिल्ल्यो खेळां सुविदा तयार केल्यात. राष्ट्रीय खेळां सर्तीक लागून गोंयच्या पर्यटनांत वाड जातली, गोंयचे अर्थीक उदरगतीक चालना मेळटलीं, अशें प्रधानमंत्री नरेंद्र मोदी हांणी सांगलें.

37 वे राष्ट्रीय खेळां सर्तीचें उक्तावण प्रधानमंत्री मोदी हांचे हस्तुकीं जालें. ह्या वेळार राज्यपाल पी. एस. श्रीधरन पिल्लई, केंद्रीय खेळां मंत्री अनुराग ठाकूर, गोंयचे खेळां मंत्री गोविंद गावडे, खासदार फ्रान्सीस सार्दिन, खासदार श्रीपाद नायक, खासदार सदानंद तानावडे, सभापती रमेश तवडकार, मंत्री विश्वजीत राणे, ऑलिंपीक असोसिएशनाची अध्यक्ष पी. टी. उषा, आमदार विजय सरदेसाय, आमदार दिगंबर कामत हाजीर आशिल्ले. कात्या कुएलो आनी हरमनप्रीत सिंग हांणी खेळां मशाल प्रधानमंत्र्यां कडेन दिली.

प्रधानमंत्री मोदी हांणी सांगलें, गोंयान खूबशे खेळगडे देशाक दिल्यात. फुटबॉला खातीर गोंयकार भारावतात. देशांतल्या पोरण्या फुटबॉल क्लबां मदीं गोंयचो उल्लेख जाता. अश्या गोंयांत राष्ट्रीय खेळां सर्त जाता, ही उमेदीची गजाल आसा. देश खेळां सर्तींत मुखार सरता. 70 वर्सांत जें जावंक नाशिल्लें तें हे खेपे आशियायी सर्तींत जालें. खेळगड्यांनी 100 परस अदीक पदकां जिखलीं. एशियन पॅरा गेम्सांत आतां मेरेन 70 परस अदीक पदकां मेळयल्यात आनी रेकॉर्ड लेगीत मोडल्यात. वर्ल्ड युनिव्हर्सिटी गेम्सांत भारतान इतिहास रचला. ही खेळाची उदरगत खेळगड्यां खातीर उर्बा दिवपी आसा. राष्ट्रीय खेळां सर्त खेळगड्यां खातीर संद आसा. खूबश्यो संदी मुखार आसात, पुराय तांकीन खेळांत बरें प्रदर्शन करचें.

भारताच्या गांवागांवांनी गुणवत्तेचो उणाव ना. हे आदीं लेगीत भारतान खूबशे खेळगडे दिल्यात. आंतरराष्ट्रीय पदकांच्या तकट्यांत भारत सदांच फाटीं उरतालो. 2014 सावन खेळामळार लक्ष दिलें. खेळां सुविधा उबारल्यो, निवड चांचणी पारदर्शक केली. खेळगड्यांक अर्थीक मजत आनी प्रशिक्षण दिवपाचे येवजणेंत बदल केले. समाजाचे मानसिकतायेंत लेगीत बदल केलो. खेळां मळा वयल्यो आडखळी एकेक करून पयस केल्यो. गुणवत्तापूर्ण खेळगड्यांक सोदून तांकां ऑलिंपिका मेरेन व्हरपाचो रोडमॅप तयार केलो. हाचो परिणाम आतां देशभरांत दिसपाक लागला.

हे आदींच्या सरकारांनी खेळां मळा खातीर अर्थसंकल्पांत तजवीज करपा खातीर आंग मारिल्लें. खेळां खातीर खर्च करिनाशिल्ले, सरकारान हो विचार बदल्लो. 9 वर्सां आदींच्या अर्थसंकल्पांतले तजविजीं परस अंदूंची खेळा मळाची तजवीज तिपेटीन चड आसा. खेलो इंडिया पासून टायगेट ऑलिंपीक पॉडियम स्कीम (टॉप्स) साबार येवजण्यो तयार केल्यो. येवजण्यां वरवीं देशभरांतल्यान शाळा, म्हाविद्यालयां, युनिव्हर्सिटींतल्यान बरे खेळगडे सोदून तांचो पुराय खर्च सरकार करता, तांकां प्रशिक्षीत करतात. खेलो इंडिया वरवीं देशांतल्या 3000 हजार खेळगड्यांचें प्रशिक्षण सुरू आसा. तांकां 6 लाख रुपयां परस चड स्कॉसरशीप दितात. तातूंतल्या 125 खेळगड्यांनी आसियायी सर्तींत वांटो घेतलो आनी 36 पदकां जिखलीं. ह्या प्रतिभावान खेळगड्यांक हे आदीं अशी संद दिवंक नाशिल्ली. खेलो इंडियांतल्यान प्रतिभावान खेळगड्यांची निवड करून टॉप्सांतल्यान तांकां ऑलिंपिका खातीर तयार करतले. देशांत निरशेवणी, नकारात्मकता आसल्यार मैदानार, जिणेंत ताचो परिणाम जाता. भारत सगळ्याच मळार मुखार सरता.

फाटल्या 30 दिसांनी खूबशीं उदरगतीचीं कामां जाल्यांत. नारी शक्ती वंदन कायदो, गगनयान चांचणी, रॅपीड रिजनल रेल्वे नमो भारत सुरू जाली, जम्मू काश्मीरांत विस्टा डोम रेल्वे सेवा, दिल्ली बडोदरा एक्सप्रेस वे उक्तावण, जी 20 परिशद, इस्रायलांतल्यान भारतीयांक परतून हाडले, 40 वर्सां उपरांत भारत श्रीलंका फेरी सेवा, ग्लोबल मेरिटायम समिटांत 6 लाख कोटींची कबलात, 5 जी वापरप्यां मदीं भारत तिसरे सुवातेर, अ‍ॅपला उपरांत गुगलान मेड इन इंडिया स्मार्ट फोन तयार करपाचें थारायलें. महाराष्ट्रांत नलवंडे धरन भुमीपुजन, तेलंगणा 6 हजार कोटींचो सुपर थर्मल पॉवर, छत्तीसगडांत 24 हजार कोटींच्या स्टील प्रकल्पाचें लोकार्पण अशे खूबशे प्रकल्प सुरू करतात, अशें प्रधानमंत्र्यांनी सांगलें. 40 वर्सां उपरांत भारतांत आंतरराष्ट्रीय ऑलिंपीक असोसिएशनाची बसका जाली. उत्तराखंडांत हॉकी स्टेडियम, वाराणसींत आंतरराष्ट्रीय क्रिकेट स्टेडियमाचें काम सुरू जालें. ग्वालियरांत दिव्यांग पॉड सेंटर आनी गोंयांत राष्ट्रीय खेळां सर्त जाता. ही फक्त फाटल्या 30 दिसांतलीं उदरगतीचीं कामां आसात, अशेंय प्रधानमंत्री मोदी हांणी सांगलें.

माय भारत उपक्रमाचो एकता दिसा शुभारंभ

देशांतल्या सगळ्याच मळार दोळ्यांत भरपा सारकीं कामां जायत आसात. विकसीत भारता खातीर सगळो वावर चल्ला. ह्या सगळ्यांच्या मुळा कडेन भारताचो युवा वर्ग आसा. भारताच्या युवा वर्गाच्या राष्ट्रीय संकल्पा कडेन जोडपा खातीर मेरा युवा भारत, माय भारत नांवान नवो उपक्रम सुरू करतले. तातूंत ग्रामीण आनी शार दोनूय कडल्या युवा वर्गाक एकामेका कडेन आनी सरकारा कडेन संलग्न करपाचें वन स्टॉप सेंटर आसतलें. 31 ऑक्टोबराक एकदा दिसा माय भारत उपक्रम सुरू करतले. त्या दिसा जावपी रन फॉर युनिटींत सगळ्यांनी वांटो गेवचो. तातूंतल्यान राष्ट्र निर्मणी खातीर तरणाट्यांक संद दितले. भारताचे युवा शक्तीक विकसीत भारताची शक्त करतले, अशें प्रधानमंत्री नरेंद्र मोदी हांणी सांगलें.

2030त युवा ऑलिंपीक, 2036त ऑलिंपीक भारतांत

भारत संकल्प आनी प्रयास आकांताचो आसा, भारताचो हावेस व्हड आसा. ताका लागून भारत 2030त युवा ऑलिंपिकाक जाल्यार 2036त ऑलिंपिका खातीर तयार आसतलो, अशें ऑलिंपीक समितीचे बसकेंत सांगलां. ऑलिंपिकाच्या आयोजना खातीर फक्त भावनाच न्हय जाल्यार ते फाटल्यान कारणां आसात. 2036त फुडल्या 13 वर्सां उपरांत भारत संवसारांतल्या सगळ्यांत व्हड अर्थीक शक्ती मदलो एक आसतलो. खेळां पासून अंतराळा मेरेन भारताचो तिरंगो हुबतलो. ऑलिंपीक आयोजना खातीर दळणवळणाच्यो सोयी आनी साधन सुविधांची गरज आसतली. आधुनीक साधन सुविधां खातीर भारत 100 लाख कोटीं परस चड खर्च करपाक तयार आसा. हे खातीर ऑलिंपीक आयोजन सोंपें जातलें, अशें प्रधानमंत्री नरेंद्र मोदी हांणी सांगलें.

गोंयाचो पर्यटन रोडमॅप जी 20 देशांनी आपणायलो

गोंय उत्सवां खातीर वळखतात. आंतरराष्ट्रीय चित्रपट महोत्सवा खातीर गोंयाक संवसारभरांत वळखतात. केंद्र सरकार गोंयाक आंतरराष्ट्रीय बसका, परिशद आनी चर्चासत्रांचें व्हड केंद्र तयार करता. 2016त बिक्स परिशद आयोजीत केली, जी 20 परिशद गोंयांत जाली. पर्यटन मलार शाश्वत उदरगतीचो गोंय रोडमॅप फॉर टुरिझमाच्या जी 20 वांटेकार जाल्ल्या देशांनी सगळ्यांच्या मतान आपणायला, अशें प्रधानमंत्री नरेंद्र मोदी हांणी सांगलें.