भांगरभूंय | प्रतिनिधी
मुख्यमंत्री डॉ. प्रमोद सावंतः पीएच. डी. अभ्यासक्रम सुरू करपाचो प्रस्ताव, जूनांत नवे अभ्यासक्रम
भांगरभूंय । प्रतिनिधी
पणजीः कोरोना म्हामारी तशेंच केंद्र आनी राज्या मदल्या समन्वयाच्या उणावाक लागुन राष्ट्रीय उदका खेळ संस्थेचे इमारतीचें काम खूब तेंपा सावन प्रलंबीत आसा. 2014 त सुरू जाल्लें इमारतीचें काम मेंत पुराय जातलें, अशें मुख्यमंत्री डॉ. प्रमोद सावंत हांणी सांगलें. हे संस्थेंत पर्यटन वाठारांत बीबीए, एमबीए तशेंच पीएच. डी. अभ्यासक्रम सुरू जातले, अशेंय तांणी सांगलें.
पणजेच्या करंजाळे वाठारांत राष्ट्रीय उदका खेळ संस्थेच्या इमारत प्रकल्पाचें (एमआयडब्ल्यूएस) काम चालू आसा. मुख्यमंत्री डॉ. सावंत हांणी सोमारा इमारतीच्या कामाची पळोवणी केली. संस्थेचे तात्पुरते सुवातेंत उणे मुजतीचे अभ्यासक्रम चलतात. ह्या अभ्यासक्रमांचो देशभरांतले 2,500 विद्यार्थी लाव घेतात. इमारतीचें काम मे मेरेन पुराय जातलें आनी जूनांत नवे अभ्यासक्रम सुरू जातले, अशी आस्त मुख्यमंत्री डॉ. सावंत हांणी उक्तायली.
पर्यटनांत बीबीए, एमबीए आनी पीएच. डी. पांवड्या वयले अभ्यासक्रम सुरू जावपाचे आसात. संस्थेची इमारत पुराय जाले उपरांत राज्यांत उदका खेळ पर्यटन तशेंच हेर अभ्यासक्रमांक गती मेळटली, अशें मुख्यमंत्री डॉ. सावंत हांणी सांगलें. करंजाळेच्या राष्ट्रीय उदका खेळ उदका खेळ संस्थेची इमारत हो राष्ट्रीय प्रकल्प आसा. 2014त इमारतीचें काम सुरू जाल्लें. केंद्र आनी राज्य सरकार हांचे मदीं समन्वयाचो उणाव आशिल्लो. तशेंच कोरोना म्हामारीक लागून काम बंद दवरचें पडलें. हाका लागून इमारत पुराय जावपाक कळाव जालो, अशें मुख्यमंत्री डॉ. सावंत हांणी सांगलें.
राज्याक पुरक अभ्यासक्रमः मुख्यमंत्री
राष्ट्रीय उदका खेळां संस्थेची स्थापना 1990त जाल्ली. उदका खेळ चलोवपा विशीं प्रशिक्षण दिवपा सयत खेळ सुरू करपाचे परवाने ही संस्था दिता. गोंय हें पर्यटन मळा वयलें म्हत्वाचें थळ. उदका खेळांचें प्रमाण राज्यांतल्हवू ल्हवू वाडत आसा. हाका लागून ही संस्था आनी अभ्यासक्रम राज्याक पुरक थारतले अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
