भांगरभूंय | प्रतिनिधी
खबरां संस्था
बर्मिगहॅमः बर्मिगहॅमांत सुरू आशिल्ल्या राष्ट्रकुल खेळांत भारताच्या बायलांच्या हॉकी पंगडान कांस्या पदक मेळयलें. पेनल्टी शूट आवटांत तांणी न्यूझिलंडाक 2-1 अशें हारयलें. 16 वर्सां उपरांत भारताच्या बायलांच्या हॉकी पंगडान राष्ट्रकुल सर्तींत पदक मेळयलां. भारतान सेमी फायनलींत ऑस्ट्रेलियन पंगडा आड वादग्रस्त हारीक तोंड दिवचें पडिल्लें. ताका लागून कांस्या पदका खातीर तांका न्यूझिलंडा आड खेळचें पडलें.
खेळाच्या निर्धारीत 60 मिनटांत दोनूय पंगडांची 1-1 अशी गोल बोरोबोरी जाल्ली. सलिमा टेटेन भारता खातीर पयलो गोल केलो. न्यूझिलंडाच्या ऑलिव्हिया मेरीन निमण्या खिणाक गोल करून मॅच पेनल्डी शूटआवटांत व्हेली. भारताची कॅप्टन सविता पुनियान शानदार गोलकिपींग करून न्यूझिलंडाचे चार यत्न सफळ जावपाक दिले नात. ताका लागून भारताक पदक जिखपाक येश आयलें.
भारताच्या बायल पंगडान 2002 वर्सा भांगर आनी 2006 वर्सा रुप्या पदक जिखल्लें. गट माळेच्या मॅचींनी भारतान घाना (5-0), वेल्स (3-1) आनी कॅनडाक (3-2) अशें हारयल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
