भांगरभूंय | प्रतिनिधी
उतर गोंय पुलीस अधीक्षक राहुल गुप्ता : रामा आनी ताच्या कुटुंबियांक पुलीस सुरक्षा
पणजी : समाज वावुरपी रामा काणकोणकार हांणी आदीं दिल्ल्या जबाबांत खंयच्याच राजकारणाचो हल्ल्यांत हात आसा अशें म्हणूंक नाशिल्लें. मात तांणी आतां दोन वरिश्ठ मंत्र्यांचीं नांवां घेतल्यांत. तांणी नव्यान केल्ल्या दाव्यां प्रमाण चवकशी करतले. रामा आनी ताच्या कुटुंबियांक पुलीस सुरक्षा दिल्या अशी म्हायती उतर गोंय पुलीस अधीक्षक राहुल गुप्ता हांणी दिली.
शेनवारा समाजीक कार्यकर्तो काणकोणकार हांकां गोमेकॉंतल्यान डिस्चार्ज दिलो. तेन्ना तांणी तांचेर हल्लो जावपाक दोन मंत्र्यांचो हात आशिल्ल्याचो दुबाव उक्तायल्लो. हे विशीं तपासाची म्हायती दिवपा खातीर पुलीस महासंचालक आलोक कुमार हांणी पत्रकार परिशद घेतली. ह्या वेळार अधीक्षक गुप्ता हांणी वयर दिल्ली म्हायती दिली. उपअधीक्षक तशेंच तपास अधिकारी सुदेश नायक आनी निरीक्षक विजयकुमार चोडणकारूय ह्या वेळार हजर आशिल्ले.
रामा काणकोणकार हाचेर 18 सप्टेंबराक करंझाळे हांगा हल्लो जाल्लो. हे विशीं पणजी पुलिसांनी गुन्यांव दाखल करून ह्या प्रकरणांत वाटो आशिल्लो खांपो गूंड अँथनी नादार, फ्रान्सिस नादार, मिंगेल आरावजो, मनीष हडफडकर, सुरेश नायक, फ्रांको डिकॉस्टा आनी साईराज गोवेंकार ह्या सात दुबावितांक अटक केली. उपरांत तांतल्या कांय दुबावितांनी दिल्ले जबानीची दखल घेवन पुलिसांनी 21 सप्टेंबराक गूंड जेनिटो कार्दोझ हाका अटक केली. उपरांत जायते फावटीं काणकोणकार हांचो जाबाब नोंद करपाक पुलिसांनी आनी जिल्लोदंडाधिकार्यांनी यत्न केलो. मात तांणी जबाब दिवपाक न्हयकार दिलो. निमाणें 2 ऑक्टोबराक रामा काणकोणकार हांणी पुलिसांक आपलो जबाब दिलो.
मिंगेल आरावजो हो आपलो फाटलाव करता. तशेंच मारपेट करतना हल्लो करप्यांनी आपल्याक ‘गावडो’ आनी ‘राखणदार’ म्हणिल्ल्याचें तांणी काणकोणकार हांणी जबाबांत सांगलें. हाची दखल घेवन पुलिसांनी गुन्यांवांत अनुसूचित जाती आनी अनुसूचित जमाती (छळ प्रतिबंध) कायद्या खाला कलम जोडलें. तशेंच प्रकरणाचो तपास पुलीस उपअधीक्षक सुदेश नायक हांचे कडेन वर्ग केलो. हाचे मजगतीं गूंड जेनिटो कार्दोझ हाणें न्यायालयांत जामीन अर्ज दाखल केलो. ताका काणकोणकार हांणी विरोध करून न्यायालयांत अर्ज दाखल केल्ल्याची म्हायती पुलीस अधीक्षक राहुल गुप्ता हांणी दिली.
मजगतीं, शेनवारा काणकोणकार हांकां हॉस्पिटलांतल्यान यांना डिस्चार्ज दिले उपरांत तांणी दोन राजकारणी आपल्या हल्ल्या फाटल्यान आशिल्ल्याचो दुबाव उक्तायलो. हाची दखल घेवन अधीक्षक गुप्ता हांणी गरज पडल्यार काणकोणकार हांचो परत जबाब नोंद करतले. तशेंच काणकोणकाराक न्यायदंडाधिकार्या मुखार जबाब नोंद करपाची तरतूद आशिल्ल्याची म्हायती दिली.
काणकोणकर हांचेर जाल्ल्या हल्ल्याचो तपास गुणवत्ते प्रमाण करतले. तशेंच आतां मेरेन आठ जाणांचेर कारवाय केल्या. तांतल्या जेनिटो कार्दोझ हांणी न्यायालयांत जामीन अर्ज दाखल केला. ताका आमी विरोध केला.
मजगतीं, काणकोणकार हांच्या जबाबाचें व्हिडिओ रेकॉर्डिंग केलां. तेन्ना तांणी राजकारण्यांचो हात आशिल्ले विशीं कसलीच म्हायती दिवंक ना. मजगतीं काल तांणी अचकीत केल्ल्या दाव्याचेर चवकशी करतले. तपास अधिकारी तशेंच पुलीस उपअधीक्षक सुदेश नायक हांणी सांगलें, रामा काणकोणकार हांचो जबाब नोंद केल्लो. मात तांणी हॉस्पिटलांतल्यान डिस्चार्ज मेळ्ळे उपरांत गंभीर दावो केला. ह्या प्रकरणांत आतां मेरेन पुलिसांनी निष्पक्ष आनी जलद चवकशी केल्या. मात वयर केल्ल्या दाव्याचें सत तपासपाक पुलीस चवकशी जातली, अशें गुप्ता हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
