भांगरभूंय | प्रतिनिधी
– रानांत उजो लावप्यांचेर जातली खर कारवाय
– ड्रोन वापरपा खातीर खासा प्रशिक्षण
भांगरभूंय । प्रतिनिधी
पणजी: सरकारी रानां वाठार तशेंच अभयारण्यांत उजो घालपा सयत हेर हरकतींचेर नियंत्रण दवरपा खातीर आतां ड्रोनाच्या माध्यमांतल्यान रान खातें नदर दवरतलें. ड्रोन हाताळपा खातीर कर्मचाऱ्यांक फावो तें प्रशिक्षण दितले, अशें रान मंत्री विश्वजीत राणे हांणी सांगलें.
मंत्री राणे हांणी सोमारा रान खात्याच्या अधिकाऱ्यां सयत बसका घेतली. बसके उपरांत पत्रकार परिशदेंत तांणी निर्णयांची म्हायती दिली. सध्या तरी 10 द्रोण हाडपाचो प्रस्ताव आसा.
पोरूं रानां वाठारांक उजो लागपाच्यो घडणुको घडिल्ल्यो. सत्तरी म्हाला सयत सगळ्या म्हालांनी उजो लागपाच्यो घडणुको घडल्यो. उजो पालावपा खातीर नौदळाच्या हेलिकॉप्टरांची मजत घेवची पडली. उजो नियंत्रणांत येवपाक बरोच वेळ लागलो. कोणे तरी भायल्यान येवन उजो घातलो आनी तो सगळ्याक पातळ्ळो आनी दुर्घटणा जाली, अशें रान मंत्र्यांनी सांगलें. रानां तशेंच अभयारण्या वाठारांतल्या घडणुकांचेर आतां ड्रोणाच्या माध्यमांतल्यान रान खातें नदर दवरतलें. हाचे खातीर ट्रॅकर्स तशेंच हेर कर्मचाऱ्यांक प्रशिक्षण दितले. 31 डिसेंबरा पयलीं प्रशिक्षणाची कार्यावळ पुराय जातली.
सरकार आपदा मित्र तशेंच आपदा सखीक आपत्कालीन स्थितीक तोंड दिवपाचें प्रशिक्षण दितात. आपदा मित्र तशेंच आपदा सखींक द्रोण वापरपाचे लेगीत प्रशिक्षण दिवपाची गरज आसा. उजो लागून झाडांचें लुकसाण जाल्लें, त्या वाठारांत झाडां लावपाची मोहीम सुरू आसा. 365 हॅक्टर जमनीर झाडां लावपाची मोहीम सुरू आसा, अशें मंत्री राणे हांणी सांगलें.
उजो घातल्यार जातली कारवाय
रानां तशेंच अभयारण्य वाठारांत उजो घालपा सयत हेर हरकती केल्यो, जाल्यार ताचेर खर कारवाय जातली. हे विशींची अधिसुचोवणी जारी करपा खातीर जिल्होधिकाऱ्यांक पत्र बरयलां. अधिसुचोवणी जारी जाले उपरांत नेमा प्रमाण कारवाय करप शक्य जातलें. उजो घालपा सयत झाडां मारप, रानवटी प्राण्यांची शिकार हे कार्यावळींचेर बंदी आसतली.
रानां वाठारांत म्होंवामूस पोसपाचो उपक्रम
रानां वाठारांत म्होंवामूस पोसपाचो उपक्रम सुरू जातलो. केंद्राचे येवजणे खाला हाची कार्यवाही जातली. फुडल्या सप्तकांत आपूण केंद्रीय रानां आनी पर्यावरण मंत्री भुपेंद्र यादव हांची भेट घेतलों. म्होंवामूस पोसपाचो उपक्रम थारावीक कालावधी खातीर आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
